ԵՐԵՎԱՆ, 17 նոյեմբերի, Sputnik – Խաչիկ Չախոյան. Հայաստանի ազգային հավաքականը Ազգերի լիգայի խմբային փուլում մրցակցի հարկի տակ 2։1 հաշվով առավելության հասավ Լատվիայի ընտրանու նկատմամբ։
Մինչ այս հանդիպումը Հայաստանի հավաքականը յուրահատուկ հակառեկորդ ուներ։ Մեր ընտրանին նախորդ 26 խաղերում չէր կարողացել անառիկ պահել սեփական դարպասը, ու աս խաղում գոլ չընդունելու դեպքում պահպանում էր իր տեղը Ազգերի լիգայի С խմբում։
Առաջին խաղակեսում փոփոխական հաջողությամբ էր խաղը ընթանում, հիմնականում հավասար պայքար էր։ Նաիր Տիկնիզյանը 31-րդ րոպեին շատ լավ հնարավորություն ուներ հաշիվը բացելու, սակայն շեղ հարվածեց։ Առաջին կեսի վերջնամասում մեր թիմը մի քանի անգամ իրար հետևից սպառնաց դաշտի տերերի դարպասին, բայց գրոհի եզրափակումը չէր ստացվում։ Ի վերջո թիմերը գնացին ընդմիջման առանց գոլային իրական պահ ստեղծելու։
Երկրորդ խաղակեսի մեկնարկում մեր հավաքականը վերջապես հասավ իր նպատակին։ Նախ Ռանոսի հարվածից հետո լատվիացիներին փրկեց դարպասապահ Ռիխարդ Մատրեվիցսը, ապա Լուկաս Սելարայանի փոխանցումից հետո Էդուարդ Սպերցյանը գլխի հարվածով առաջ մղեց մեր թիմին։ Դաշտի տերերը հաշիվը հավասարեցնելու հիանալի շանս ունեին երկրորդ կեսի միջնամասում, բայց Օգնեն Չանչարևիչը փրկեց մեր թիմին։ Երկու րոպե անց, սակայն, Լատվիան խփեց պատասխան գնդակը։
Սակայն մերոնք շատ արագ նորից առաջ անցան հաշվի մեջ։ Սելարայանի հարվածից հետո գնդակը դիպավ դարպասի հորիզոնական ձողին, իսկ վրա հասած Արթուր Միրանյանը այն ուղարկեց դարպասային գծից ներս։ Հաղթական հաշիվը մերոնք պահպանեցին, ու երեք միավոր վաստակելով՝ խմբում զբաղեցրին երկրորդ տեղը։ Հայ ֆուտբոլիստները B լիգա անցնելու համար կմասնակցեն անցումային խաղերին։
Լուկաս Սելարայանը ՈւԵՖԱ Ազգերի լիգայի Լատվիա - Հայաստան հանդիպմանը
© Photo : Football Federation of Armenia
Լատվիա-Հայաստան խաղին զուգահեռ ընթանում էր նաև մեր խմբի մյուս հանդիպումը Հյուսիսային Մակեդոնիայի և Ֆարերյան կղզիների հավաքականների միջև։ Հյուսիսային Մակեդոնիայի հավաքականը հաղթեց 1։0 հաշվով ու տեղափոխվեց B լիգա։