ԵՐԵՎԱՆ, 15 նոյեմբերի – Sputnik. Սուխումում ցուցարարները ներխուժել են նախագահի նստավայր։ Տեղեկությունը հայտնում է Sputnik Աբխազիան։
Ռուսաստանի հետ ներդրումային համաձայնագրի վավերացմանը դեմ հանդես եկող ակտիվիստները նախագահի նստավայր են ներխուժել խորհրդարանի տարածքով։
Խորհրդարանում նրանք տակնուվրա են արել նիստերի դահլիճը, կոտրել որոշ աշխատասենյակների ապակիները։ Ցուցարարներն այժմ քաղաքական պահանջներ են ներկայացնում. հայտարարում են, որ չեն ցրվի, քանի դեռ երկրի ղեկավար Ասլան Բժանիան հրաժարական չի տվել և նոր ընտրություններ չեն անցկացվել:
Ավելի վաղ խորհրդարանի շենքի մոտ բախումներ էին տեղի ունեցել ուժայինների և ցուցարարների միջև, մի քանի մարդ էր տուժել: Բողոքի ցույցերի ֆոնին իշխանությունները հայտարարել են, որ որոշել են հետ կանչել պայմանագիրը։
Հիշեցնենք` հոկտեմբերի 30-ին Մոսկվայում ստորագրված համաձայնագիրը ռուսական ընկերություններին թույլ է տալիս ներդրումային ծրագրեր իրականացնել Աբխազիայի տարածքում։ Ինչպես ավելի վաղ հայտարարել էր Աբխազիայի խորհրդարանի միջազգային կապերի հանձնաժողովի ղեկավար Ալխաս Բարցիցը, Աբխազիան ինքնուրույն չի կարողանա միջոցներ գտնել իր տնտեսության առանցքային, հիմնարար ոլորտները վերականգնելու համար։