ԵՐԵՎԱՆ, 15 նոյեմբերի – Sputnik. Աբխազիայի իշխանությունները կկատարեն Ռուսաստանի հետ ներդրումային համաձայնագրի վավերացման դեմ բողոքող ցուցարարների պահանջները: Ինչպես հայտնում է Sputnik Աբխազիան, հանրապետության ղեկավարի վարչակազմը փաստաթուղթ է պատրաստում Ռուսաստանի հետ համաձայնագրի վավերացման մասին օրինագիծը խորհրդարանից հետ կանչելու մասին:
Նշվում է, որ որոշումն ընդունվել է հանրապետությունում իրավիճակի կայունացման համար:
Ավելի վաղ խորհրդարանի շենքի մոտ բախումներ էին տեղի ունեցել ուժայինների և ցուցարարների միջև: Սուխումի շտապօգնության գլխավոր բժշկի խոսքով՝ տուժել է 8 մարդ։ Ակտիվիստները ճեղքել էին ոստիկանական օղակը և ներխուժել նախագահի նստավայրի և խորհրդարանի շենքի բակ: Արդյունքում խորհրդարանի նիստը չեղարկվել էր։
Հիշեցնենք` հոկտեմբերի 30-ին Մոսկվայում ստորագրված համաձայնագիրը ռուսական ընկերություններին թույլ է տալիս ներդրումային ծրագրեր իրականացնել Աբխազիայի տարածքում։ Ինչպես ավելի վաղ հայտարարել էր Աբխազիայի խորհրդարանի միջազգային կապերի հանձնաժողովի ղեկավար Ալխաս Բարցիցը, Աբխազիան ինքնուրույն չի կարողանա միջոցներ գտնել իր տնտեսության առանցքային, հիմնարար ոլորտները վերականգնելու համար։