ԵՐԵՎԱՆ, 15 նոյեմբերի – Sputnik. Հայաստանի համար Ռուսաստանի հետ համագործակցությունը կարևոր է, հատկապես պարենային անվտանգության ոլորտում։ Այս մասին հայտարարել է ՀՀ էկոնոմիկայի նախարար Գևորգ Պապոյանը ՌԴ գյուղատնտեսության նախարար Օկսանա Լուտի հետ հանդիպման ժամանակ։ Տեղեկությունը հայտնում է ՀՀ էկոնոմիկայի նախարարությունը։
«Հանդիպման ընթացքում քննարկվել են ՌԴ-ի հետ առևտրաշրջանառության ավելացմանը, պարենային անվտանգության ապահովմանը, պարենային ապրանքների արտահանումների կազմակերպմանը, տոհմային անասնաբուծության զարգացմանը, գյուղատնտեսական կենդանիների պատվաստանյութերի ձեռքբերմանը, ալկոհոլային արտադրանքի արտահանմանը, ինչպես նաև գյուղատնտեսական մշակաբույսերի մշակության ժամանակ թունաքիմիկատների կիրառմանը վերաբերող հարցեր»,-նշված է հաղորդագրության մեջ։
Կողմերը կարևորել են գյուղատնտեսության ոլորտում առկա համագործակցության ընդլայնումը և պատրաստակամություն հայտնել շարունակական քայլեր ձեռնարկել այդ ուղղությամբ։
Հավելենք, որ հանդիպմանը ներկա է եղել նաև ՀՀ-ում ՌԴ արտակարգ և լիազոր դեսպան Սերգեյ Կոպիրկինը։
Հիշեցնենք՝ այսօր՝ ավելի վաղ, ՀՀ փոխվարչապետ Մհեր Գրիգորյանն ու Ռուսաստանի Դաշնության գյուղատնտեսության նախարար Օկսանա Լուտը պարենային անվտանգությանն առնչվող հարցեր էին քննարկել։
ՀՀ էկոնոմիկայի նախարար Գևորգ Պապոյանն ավելի վաղ հայտարարել էր, որ ՌԴ գյուղնախարարը Հայաստան է ժամանելու անասունների համար պատվաստանյութերի վաճառքի նոր սխեմաները քննարկելու համար: