Սուխումում ցուցարարները տապալել են կառավարական շենքերի համալիրի ցանկապատը։ Տեղեկությունը հայտնում է Sputnik Աբխազիան: Նրանք ճեղքել են ուժայինների շղթան և մտել նախագահի նստավայրի և խորհրդարանի շենքի տարածքներ։
Ավելի վաղ հայտնել էինք, որ այսօր խորհրդարանում պետք է քննարկվեր Ռուսաստանի հետ ներդրումային համաձայնագրի վավերացումը, բայց խորհրդարանի շենքի մոտ բախում էր տեղի ունեցել ուժայինների և բողոքի ակցիայի մասնակիցների միջև: Արդյունքում պատգամավորները չեղյալ են հայտարարել նիստը։
Սուխումի շտապօգնությունից հայտնել են, որ բախումների հետևանքով 2 մարդ է տուժել։
Ըստ լրատվամիջոցների` պատգամավորներն ու նախարարները լքել են Սուխումի կառավարական շենքերի համալիրը։
Անկարգությունները սկսվել են, երբ մի խումբ ընդդիմադիրներ հարձակվել են Աբխազիայի խորհրդարանի պատգամավորի վրա։ Սակայն մեղավորներին ձերբակալելուց հետո նրանց կողմնակիցները շարժվել են դեպի ներքին գործերի նախարարության և պետանվտանգության ծառայության շենքեր՝ պահանջելով ազատ արձակել ձերբակալվածներին:
Հանրապետության ներքին գործերի նախարարն ու պետանվտանգության ծառայության ղեկավարը դուրս են եկել բանակցելու ցուցարարների հետ։
Հիշեցնենք` հոկտեմբերի 30-ին Մոսկվայում ստորագրված համաձայնագիրը ռուսական ընկերություններին թույլ է տալիս ներդրումային ծրագրեր իրականացնել Աբխազիայի տարածքում։ Ինչպես ավելի վաղ հայտարարել էր Աբխազիայի խորհրդարանի միջազգային կապերի հանձնաժողովի ղեկավար Ալխաս Բարցիցը, Աբխազիան ինքնուրույն չի կարողանա միջոցներ գտնել իր տնտեսության առանցքային, հիմնարար ոլորտները վերականգնելու համար։