ԵՐԵՎԱՆ, 14 նոյեմբերի - Sputnik. Լիբանանի մի շարք շրջաններում իսրայելական հարվածների զոհ է դարձել ևս 21 մարդ, վիրավորվել է 73 խաղաղ բնակիչ: Այս մասին հայտնում է ՌԻԱ Նովոստին՝ հղում անելով Լիբանանի առողջապահության նախարարությանը կից արտակարգ իրավիճակների կենտրոնին։
Նշվում է, որ Լիբանանի ուղղությամբ Իսրայելական հարվածների մեկնարկից ի վեր զոհերի թիվը հասել է 3 386-ի, տարբեր աստիճանի վնասվածքներ է ստացել 14 417 մարդ:
Իսրայելը հոկտեմբերի 1-ից ցամաքային գործողություն է իրականացնում Լիբանանի հարավում «Հզբոլլահի» ուժերի դեմ և շարունակում է հարևան երկրի օդային ռմբակոծությունները, որտեղ խաղաղ բնակիչներից բացի զոհվել են շիաների շարժման առաջնորդներ, ավելի քան մեկ միլիոն մարդ փախստական է դարձել:
Չնայած կորուստներին, այդ թվում՝ հրամանատարական կազմում, «Հզբոլլահը» ցամաքային մարտեր է մղում և չի դադարեցնում Իսրայելի տարածքի հրթիռակոծումը:
Որպես ռազմական արշավի գլխավոր նպատակ, Իսրայելում նշում են հյուսիսի 60 հազար բնակիչների վերադարձի համար պայմանների ստեղծումը, որոնք տարհանվել էին մեկ տարի առաջ՝ «Հզբոլլահի» կողմից պաղեստինյան ՀԱՄԱՍ շարժմանն աջակցելու համար սկսված գնդակոծությունների պատճառով: