ԵՐԵՎԱՆ, 14 նոյեմբերի – Sputnik. Դամասկոսի Մազե և Քուդսեյ շրջանների ուղղությամբ իսրայելական ավիահարվածների հետևանքով 15 մարդ է մահացել։ Տեղեկությունը հայտնում է ՌԻԱ Նովոստին` հղում անելով Սիրիայի պաշտպանության նախարարությանը:
«Այսօր երեկոյան Իսրայելը գրավված Գոլանի բարձունքների տարածքից ավիահարվածներ է հասցրել Մազեի եւ Քուդսեյի բնակելի թաղամասերին, ինչի հետևանքով 15 մարդ է մահացել, ևս 16-ը վնասվածքներ ստացել»,– ասված է գերատեսչության պաշտոնական հայտարարության մեջ:
Ըստ ՊՆ–ի` մահացածների թվում կանայք և երեխաներ կան, ավիահարվածների հետևանքով շինություններ են վնասվել։
Հիշեցնենք` իսրայելցի զինվորականները պարբերաբար հարվածներ են հասցնում Սիրիայի տարածքին լիբանանյան «Հզբոլլահ» շարժման դեմ իրականացվող գործողությունների շրջանակում: Ավելի վաղ իսրայելական անօդաչուները գրոհել էին Դամասկոսի Զեյնաբ շրջանում գտնվող բնակելի տունը, որի հետևանքով յոթ մարդ էր մահացել։ Սիրիայի մայրաքաղաքի հարավային մասում գտնվող թաղամասում հազարավոր փախստականներ են տեղավորվել հարևան Լիբանանից: