ԵՐԵՎԱՆ, 14 նոյեմբերի – Sputnik. Հայաստանում բժիշկների արագ արձագանքման ջոկատ կստեղծվի՝ նախատեսված արտակարգ իրավիճակներում արագ բուժօգնություն ցուցաբերելու համար ինչպես երկրի ներսում, այնպես էլ արտերկրում։
«Բնակչության բժշկական օգնության և սպասարկման մասին» օրենքում համապատասխան փոփոխությունների նախագիծը խորհրդարանում ներկայացրել է առողջապահության փոխնախարար Լենա Նանուշյանը։ Նա պարզաբանել է, որ բժիշկներին արտերկիր ուղարկելու որոշումը կկայացնի վարչապետը։
Նանուշյանը հիշեցրել է, որ համավարակի և 2020 թվականի 44-օրյա պատերազմի ժամանակ օտարերկրյա բժշկական խմբերը Հայաստան էին գալիս ոչ միայն տուժածներին օգնելու, այլև հայ բժիշկների համար արագացված վերապատրաստման դասընթացներ անցկացնելու։
«Միջազգային գործընկերների առաջարկությունների հիման վրա որոշվել է նմանատիպ խումբ ստեղծել Հայաստանում»,-ընդգծել է Նանուշյանը։
Առողջապահության նախարարությունն առաջարկում է նաև բժիշկների վերապատրաստման ծրագրում երկու պարտադիր բաղադրիչ ավելացնել․ արտակարգ իրավիճակներում օգնություն ցուցաբերելու հմտությունների դասընթաց և բժշկական էթիկայի դասընթաց։
Մասնագիտական հավատարմագրման շրջանակում բժիշկները պարտավոր կլինեն հինգ տարին մեկ որոշակի թվով կրեդիտներ հավաքել, հիմնականում դասընթացներին և սեմինարներին մասնակցելու միջոցով: Հիմա այդ կրեդիտների մի մասը անհրաժեշտ կլինի ստանալ հենց այդ ուղղություններով, քանի որ, ըստ նախարարության, յուրաքանչյուր բժիշկ պետք է համապատասխան գիտելիքներ ունենա՝ անկախ մասնագիտացումից։
Նանուշյանը հիշեցրել է, որ նման հմտությունների անհրաժեշտությունն ակնհայտ դարձավ COVID-19 համավարակի ժամանակ, երբ նույնիսկ նեղ մասնագիտացում չունեցող բժիշկները ստիպված էին աշխատել ճգնաժամային պայմաններում։
Նշենք, որ 2019 թվականի փետրվարից հայ ռազմաբժիշկներն ու սակրավորները մարդասիրական առաքելություն են իրականացնում Սիրիայում՝ ռուսական ռազմական կոնտինգենտի պաշտպանության ներքո։