ԵՐԵՎԱՆ, 13 նոյեմբերի - Sputnik. Այն անձինք, ովքեր 2017 թվականի սեպտեմբերի 1-ից մինչև 2023 թվականի նոյեմբերի 22-ն արտերկրում Ռուսաստանի քաղաքացիություն են ընդունել և երդում չեն տվել, պետք է դիմեն Ռուսաստանի արտասահմանյան հաստատություն, որտեղ քաղաքացիություն ստանալու դիմում են ներկայացվել, հայտնել Է ՌԴ ԱԳՆ հյուպատոսական վարչությունը։
Նշվում է, որ մինչև 2017 թվականի սեպտեմբերի 1-ը քաղաքացիություն ընդունած անձինք երդում տալու խնդիր չունեն:
Երդման ընթացակարգը ռուսաստանյան օրենսդրության պահանջ է դարձել 2017 թվականի սեպտեմբերի 1-ից և տարածվում է 18 տարին լրացած բոլոր դիմողների վրա: Սկսած այդ պահից` Ռուսաստանի քաղաքացիություն ստանալու որոշումն ինքնին հիմք չէ անձին Ռուսաստանի Դաշնության քաղաքացի ճանաչելու համար: Քաղաքացիությունը ձեռք է բերվում անձի երդման պահից, այլ ոչ թե որոշման կայացման օրվանից:
Այն անձինք, ովքեր ստացել են Ռուսաստանի քաղաքացիություն, սակայն երդման ընթացակարգ չեն անցել, 2024 թվականի նոյեմբերի 23-ից կզրկվեն Ռուսաստանի քաղաքացու կարգավիճակից։