«Այս Ազգային ժողովը վախենում է այնպիսի մի հայտարարություն անել, որը կարող է Ադրբեջանին գրգռել»․-խորհրդարանում լրագրողների հետ ճեպազրույցում ասել է «Հայաստան» խմբակցության անդամ Արմեն Ռուստամյանը՝ մեկնաբանելով «Քաղաքացիական պայմանագիր» խմբակցության չմասնակցելը Բաքվում պահվող հայ ռազմագերիների վերաբերյալ հայտարարության քվեարկությանը։
«Երևի 20 տարուց ավելի պատգամավորական կենսագրություն ունեմ, բայց չէի պատկերացնի, որ Ազգային ժողովն այս հարցը ոչ միայն կարող է դարձնել իմ ու քո հարց, այլ մերժել։ Սենց կարող էր լինել Միլի մեջլիսում»,-հավելել է Ռուստամյանը։
Նրա խոսքով՝ իր մոտ խորանում է այն տպավորությունը, թե Հայաստանի իշխանությունները պատանդ են Ադրբեջանի իշխանությունների ձեռքում։
Անդրադառնալով իշխանությունների մեկնաբանությանը, թե հայտարարություններով գերիներին հնարավոր չէ վերադարձնել, կուլիսային աշխատանքներ են կատարվում՝ Ռուստամյանը համոզմունք է հայտնել, որ այս հայտարարությունը որևէ կերպ չէր խանգարի հնարավոր կուլիսային գործունեությանը։