ԵՐԵՎԱՆ, 10 նոյեմբերի – Sputnik. Հայաստանի ազգային հավաքականի և Մոսկվայի «Լոկոմոտիվի» պաշտպան Նաիր Տիկնիզյանը ցանկանում է Հայաստանի ազգային հավաքականի մարզիչը լինի մի մասնագետ, որը համեմատաբար վերջերս է ավարտել իր մարզական կարիերան։ Այս մասին ֆուտբոլիստը հայտնել է Metaratings.ru-ին։
«Այժմ միտում կա դեպի համեմատաբար երիտասարդ մարզիչներ, որոնք վերջերս են ավարտել իրենց ֆուտբոլային կարիերան։ Նույն Ռաուլը, Վան Պերսին, Կանավարոն։ Եթե նման մասնագետներից մեկը լինի նոր մարզիչը, լավ կլինի»,- ասել է Տիկնիզյանը։
Հիշեցնենք, որ հոկտեմբերի 13-ին Հայաստանի հավաքականի մարզիչ ուկրաինացի Ալեքսանդր Պետրակովը հրաժարական տվեց։ Որոշումն ընդունվել էր ՈւԵՖԱ-ի Ազգերի լիգայի խմբային փուլի չորրորդ տուրում Հյուսիսային Մակեդոնիայից կրած պարտությունից հետո (0։2):
Հանդիպումից հետո ՖԱՖ (Առաջին հայկական ճակատ) ֆան ակումբի ներկայացուցիչները հավաքվել էին Հայաստանի ֆուտբոլի ֆեդերացիայի շենքի մոտ՝ պահանջելով հանդիպում ֆեդերացիայի նախագահի հետ։ Արմեն Մելիքբեկյանը դուրս չեկավ նրանց մոտ, ինչից հետո երկրպագուները պահանջեցին նրա հրաժարականը։ ՖԱՖ-ի պահանջին աջակցեցին Հայաստանի առաջնության բարձրագույն լիգայում հանդես եկող մի քանի թիմերի ֆան-ակումբներ։
Վերջին շրջանում լրատվամիջոցները տեղեկություններ են շրջանառում գլխավոր մարզիչի պաշտոնում լեգենդար նախկին ֆուտբոլիստ Ռաուլ Գոնսալեսի հնարավոր նշանակման մասին։