ԵՐԵՎԱՆ, 10 նոյեմբերի – Sputnik. Ոստիկաններն ու քննիչները պարզել են Արարատի մարզի Նոր Խարբերդի բնակիչ 17-ամյա Դավիթ Պողոսյանի սպանության որոշ հանգամանքներ։ Այս մասին գրում է shamshyan.com-ը։
Ավելի վաղ հայտնել էինք, որ նոյեմբերի 8-ին Արարատի մարզի Նոր Խարբերդի գերեզմանոցների մոտ վիճաբանություն և ծեծկռտուք է տեղի ունեցել 6 երիտասարդի միջև։ Նրանցից մեկը` Արարատի մարզի Նոր Խարբերդի բնակիչ 17-ամյա Դավիթ Պողոսյանը դանակահարության արդյունքում մահացել է։
«Քրեական և համայնքային ոստիկանները 20-ից ավելի հասցեներում են եղել ու պարզել են, որ տղան թոքի մասում սուր կտրող-ծակող առարկայի հարված է ստացել ու տեղափոխվել «Մասիս» բժշկական կենտրոն, որտեղ էլ, գիտակցության չգալով, մահացել է։ Վիճաբանություն-ծեծկռտուքի, ապա սպանության պատճառը եղել է SMS հաղորդագրություն ուղարկելը»,-գրում է կայքը։
Երիտասարդը երբևէ քրեական պատմություններով աչքի չի ընկել, եղել է համեստ ու խելացի անձնավորություն։
Ոստիկաններն ու քննիչները պարզել են նաև դանակահարողի ինքնությունը։ Նրա նկատմամբ քրեական հետապնդում է հայտարարվել։