ԵՐԵՎԱՆ, 8 նոյեմբերի – Sputnik. Հայաստանի Հանրապետությունում շուրջ 2 ամսում ավելի քան 66 600 անձ պատվաստվել է սեզոնային գրիպի դեմ։ Այս մասին Sputnik Արմենիայի գրավոր հարցմանն ի պատասխան հայտնել են ՀՀ առողջապահության նախարարությունից։
ՀՀ ողջ տարածքում սեզոնային գրիպի դեմ պատվաստումները մեկնարկել են սեպտեմբերի 13-ից։
«Ընդհանուր առմամբ սեպտեմբերի 13-ից նոյեմբերի 6-ը պատվաստվել է 66 616 անձ, որից 19378-ը` Երևանում, իսկ մնացածը` մարզերում»,– հայտնել են նախարարությունից։
Նախորդ տարի նույն ժամանակահատվածում սեզոնային գրիպի դեմ պատվաստվել է 29 651 անձ։
Ընդհանուր առմամբ 2023-2024 թթ. սեզոնի համար առողջապահության նախարարությունը ձեռք է բերել 170 000 դեղաչափ սեզոնային գրիպի դեմ պատվաստանյութ, 2024-2025 թթ. սեզոնի համար` 190 000 դեղաչափ։
«ՀՀ քաղաքացիները կարող են պատվաստվել սեզոնային գրիպի դեմ 2024-2025 թթ. սեզոնին ընդառաջ և սեզոնի ամբողջ ընթացքում»,– նշել են գերատեսչությունից։
Ի դեպ, ՀՀ–ում իմունականխարգելման գործընթաց իրականացնող բոլոր բժշկական կազմակերպություններում և շարժական պատվաստումային կետերում սեզոնային գրիպի դեմ պատվաստումները կատարվում են անկախ հաշվառման կազմակերպությունից և քաղաքացիությունից։ Օտարերկրացիների համար էլ այդ գործընթացը կատարվում է ՀՀ քաղաքացիների հետ համահավասար հիմունքներով։
Ներկայում քաղաքացիները կարող են սեզոնային գրիպի դեմ պատվաստվել բոլոր պոլիկլինիկաներում, Երևանում՝ նաև շրջիկ կետերում։ ՀՀ այլ քաղաքներում սեզոնային գրիպի դեմ պատվաստումների իրականացման համար շրջիկ կետեր նախատեսված չեն։