ԵՐԵՎԱՆ, 8 նոյեմբերի – Sputnik․ «Գոյ» թատրոնի անձնակազմը նստացույց է անում՝ պահանջ ներկայացնելով ՀՀ կրթության, գիտության, մշակույթի և սպորտի նախարարությանը։
«ԿԳՄՍ նախարարությունից միջանկյալ հրատապ լուծում ենք պահանջում` վերսկսել «Գոյ» թատրոնի աշխատանքները, մինչև հարցը վերջնական լուծում ստանա դատարանի և իրավապահ մարմինների կողմից»,- գրված է թատրոնի ֆեյսբուքյան էջում։
Նրանք թատրոնի փակ դռան մոտ նստացույց են սկսել նոյեմբերի 7-ի երեկոյան։ «Գոյ» թատրոնի կառավարման խորհրդի նախագահ, ռեժիսոր Սարգիս Արզումանյանը ֆեյսբուքյան ուղիղ եթերում նշեց, որ փորձել են նաև վրաններ տեղադրել, սակայն ոստիկանությունն արգելել է։ Նստացույցի մասնակիցները չեն ընդդիմացել, քանի որ իրենց նպատակը ոչ թե կոնֆլիկտ հրահրելն է, այլ բարձրացված հարցի լուծումը։
Արզումանյանի խոսքով՝ այսօր այլ անելիք էլ ունեն, որոնց մասին ավելի ուշ կհայտնեն։
Հիշեցնենք` «Գոյը» դեմ է Սունդուկյանի անվան թատրոնին միանալու որոշմանը, որը կայացրել է ԿԳՄՍ նախարարությունը` որպես հիմք նշելով, որ «Գոյ» կենտրոնը 2022թ․ 3 մլն 436 հազար 990 դրամով թերի է կատարել տարեկան ֆինանսական պլանը, բացի այդ, հրավիրված բեմադրիչների կողմից ներկայացումներ չեն բեմադրվել, կենտրոնը չի համագործակցել ԿԳՄՍ նախարարության հետ և այլն: