ԵՐԵՎԱՆ, 7 նոյեմբերի – Sputnik․ ՀՀ կառավարությունը Հանրային ծառայությունները կարգավորող հանձնաժողովի նախագահի պաշտոնում առաջադրեց Կոտայքի նախկին մարզպետ Մեսրոպ Մեսրոպյանի թեկնածությունը։
Նոյեմբերի 5-ին հայտնել էինք, որ «Քաղաքացիական պայմանագիր» կուսակցության վարչությունը որոշել է ՀԾԿՀ նախագահի թեկնածու առաջադրել Մեսրոպ Մեսրոպյանին։
Կառավարության նիստը գլխավորող փոխվարչապետ Մհեր Գրիգորյանը հետաքրքրվեց, թե Մեսրոպյանն ինչ կարծիք ունի վերջին շրջանում հանրային տիրույթում ակտիվ քննարկվող երկու հարցերի առնչությամբ։ Խոսքը վերաբերում է ՀԾԿՀ սուբյեկտ հանդիսացող կառույցների կողմից գնումների գործընթացի կազմակերպմանն ու մատուցվող ծառայությունների որակի խնդրին։
«Որակի ցուցանիշները բարձրացնելու ուղղությամբ անելիք կա կատարված ներդրումների արդյունավետությունը հասկանալու համար»,- ասաց Մեսրոպյանը։
Նա խոստացավ, որ նշանակվելու դեպքում առաջնահերթության կարգով խոր աուդիտ կանցկացնի վերջին 10 տարում կատարված ներդրումներն ու դրանց արդյունավետությունը գնահատելու համար։
«Գնումների մասով պետք է բացառել տվյալ ընկերությունների հետ փոխկապված կառույցների մասնակցությունը, քանի որ կյանքը ցույց է տալիս՝ երբ ունենում ենք նման դեպքեր, թե՛ ձեռք բերված սարքերն ու ծառայություններն ունենում են շուկայականից ավելի բարձր գներ, թե՛ որակի վերահսկողությունը հեռու է լինում ցանկալի արդյունքից»,- ասաց Մեսրոպյանը։
Նշենք, որ Մեսրոպ Մեսրոպյանը Կոտայքի մարզպետի պաշտոնը զբաղեցրել է կես տարի` 2020 թվականի նոյեմբերի 26–ից մինչև 2021 թվականի մայիսի 27-ը։ Մինչ այդ նա Հանրային ծառայությունները կարգավորող հանձնաժողովի անդամ էր:
Հիշեցնենք` հոկտեմբերի 10–ին հայտնի դարձավ, որ աշխատանքից ազատվելու դիմում է ներկայացրել Հանրային ծառայությունները կարգավորող հանձնաժողովի նախագահ Գարեգին Բաղրամյանը, որն այդ պաշտոնում նշանակվել էր 2019թ–ին։ Գրեթե միաժամանակ հրաժարականի դիմում է ներկայացրել նաև տարածքային կառավարման և ենթակառուցվածքների նախարարի տեղակալ Հակոբ Վարդանյանը, որը մինչ նախարարություն տեղափոխվելը պատասխանատու պաշտոններ է զբաղեցրել ՀԷՑ-ում, «Տաշիր Գրուպ»-ում և «Բարձրավոլտ էլեկտրացանցեր»–ում։ Մամուլը երկու պաշտոնյաների հրաժարականները պայմանավորում է էլեկտրաէներգիայի մատակարարման ոլորտում առկա խնդիրներով, նաև այդ հարցով ԱԺ-ում տեղի ունեցած լսումներով: