ԵՐԵՎԱՆ, 7 նոյեմբերի – Sputnik. 2020 թ. սեպտեմբերի 27-ի Ադրբեջանի ագրեսիայի հետևանքով ԼՂ–ից Հայաստան տեղափոխված ուսուցիչները ևս կօգտվեն պետական աջակցության ծրագրից։ Համապատասխան որոշումն ընդունվեց ՀՀ կառավարության այսօրվա նիստի ժամանակ։
Նշվում է, որ գործող կարգավորմամբ օժանդակության ծրագրի շահառու էին միայն 2023 թ. սեպտեմբերին տեղի ունեցած ռազմական գործողությունների արդյունքում Լեռնային Ղարաբաղից բռնի տեղահանված ուսուցիչները։
«Այս ծրագրի մեկնարկից ի վեր 2020 թ. սեպտեմբերից հետո Ադրբեջանի ագրեսիայի հետևանքով Հայաստան տեղափոխված անձանցից կրթության, գիտության, մշակույթի և սպորտի նախարարությունը ստացել է բազմաթիվ դիմումներ ու զանգեր՝ առաջարկելով իրենց ևս դիտարկել ծրագրի շահառու՝ հաշվի առնելով, որ նույն պատճառով իրենք հայտնվել են նույն կարգավիճակում, ինչ 2023 թ. տեղահանված անձինք»,– ասված է որոշման հիմնավորման մեջ:
Նշենք, որ 2024 թ. բյուջեում նախատեսված է 309 մլն դրամ 500 ուսուցչի համար, 2025 թ.՝ 202 մլն 766 հազար դրամ՝ 434 ուսուցչի համար:
2024 թ. սեպտեմբերի 27–ի դրությամբ այս ծրագրի շահառու է հանդիսանում 404 ուսուցիչ։ Կառավարությունից վստահեցնում են` նոր շահառուների ավելացմամբ հնարավորություն կընձեռվի նախատեսված ծախսերի շրջանակում համալրելու մարզերի ուսումնական հաստատություններում առկա ուսուցչի թափուր տեղերը՝ նախատեսված ֆինանսավորման ծավալները չգերազանցելով: