ԵՐԵՎԱՆ, 7 նոյեմբերի – Sputnik․ Այս պահի դրությամբ COP–29-ին մասնակցելու վերաբերյալ որոշում դեռևս չի կայացվել։ Կառավարության նիստից հետո լրագրողների հետ ճեպազրույցում այս մասին ասաց ՀՀ փոխարտգործնախարար Վահան Կոստանյանը։ Նրա խոսքով՝ այս ուղղությամբ քննարկումներ են ընթանում։
Անդրադառնալով Հայաստանի և Ադրբեջանի միջև խաղաղության պայմանագրի նախագծին` Կոստանյանը նշեց՝ կան հարցեր, որոնք շարունակում են մնալ չհամաձայնեցված, և բանակցությունները շարունակվում են։ Նա շեշտեց, որ ՀՀ Սահմանադրության հարցը խաղաղության պայմանագրի մաս չէ։
«Այս պահին նախարարների կամ երկրների ղեկավարների մակարդակով հանդիպման պայմանավորվածություն չկա, բայց հայկական կողմը շահագրգռված է հանդիպումներն ինտենսիվացնել, որ հնարավոր լինի սեղմ ժամկետում ավարտել համաձայնագրի տեքստի համաձայնեցումը»,- նշեց նախարարի տեղակալը։
Անդրադառնալով Ադրբեջանի հետ բանակցությունների ձևաչափին` փոխարտգործնախարարը նշեց՝ երկու երկրների միջև բանակցություններն ուղիղ են ընթանում։
«Բայց կան Հարավային Կովկասում կայունությամբ և խաղաղությամբ իրապես հետաքրքրված գործընկերներ, որոնք փորձում են դրականորեն աջակցել այս օրակարգին»,- նշեց Կոստանյանը։
Փոխարտգործնախարարը նաև նշեց՝ տարածաշրջանային հաղորդակցությունների ապաշրջափակման հարցը թեպետ որպես կետ չկա խաղաղության համաձայնագրի նախագծում, բայց թեմայի շուրջ քննարկումները շարունակվում են։ Պաշտոնյան հիշեցրեց, որ երկու երկրների փոխվարչապետները սահմանազատման հանձնաժողովների հանդիպման ավարտից հետո նաև այս հարցին են անդրադարձել։
Կոստանյանի խոսքով` ՀՀ վարչապետ Նիկոլ Փաշինյանի ու Ադրբեջանի նախագահ Իլհամ Ալիևի կազանյան հանդիպումից հետո բանակցային գործընթացում ակտիվություն է նկատվում։ Ըստ նրա՝ մասնավորապես դրանից հետո Ադրբեջանն ի վերջո ուղարկեց նախագծի 11-րդ խմբագրումը։
Մեկնաբանելով Ադրբեջանից ստացած 11-րդ խմբագրումը` Կոստանյանը նշեց՝ կան հարցեր, որոնք այս պահին վերջնականապես համաձայնեցված չեն։
«Բայց մենք դիրքորոշումները մոտեցնելու և վերջնականացնելու հնարավորություն տեսնում ենք»,- ասաց ԱԳ նախարարի տեղակալը։
Կոստանյանը շեշտեց, որ խաղաղության գործընթացի տրամաբանության մեջ մշտապես բարձրաձայնվում է նաև ռազմագերիների հարցը։
Հիշեցնենք, որ Կլիմայի փոփոխության մասին ՄԱԿ-ի շրջանակային կոնվենցիայի մասնակիցների COP–29 գագաթնաժողովը կանցկացվի Բաքվում նոյեմբերի 11–24–ը։
2023 թվականի դեկտեմբերին Հայաստանը որպես բարի կամքի քայլ իր աջակցությունը հայտնեց այն հյուրընկալելու նպատակով Ադրբեջանի ներկայացրած հայտին և հանեց իր թեկնածությունը, իսկ Ադրբեջանն իր աջակցությունը հայտնեց Արևելյան Եվրոպայի խմբի «COP»-ի բյուրոյին անդամակցելու համար առաջադրված Հայաստանի թեկնածությանը:
Հունիսին վարչապետի մամուլի խոսնակը, անդրադառնալով Նիկոլ Փաշինյանի` Բաքու մեկնելու և COP–29–ին մասնակցելու վերաբերյալ խոսակցություններին, ասել էր, որ վարչապետի աշխատանքային օրակարգում նման այց չի պլանավորվում: