Շուտով մեկ տարի կլինի, ինչ Հայաստանում պարտադիր է դարձել սպանդանոցային մորթը։ Մեկ տարի առաջ մտավախություն կար, որ սպանդանոցները քիչ են ու չեն հասցնելու բավարարել պահանջարկը, մինչդեռ այսօր պարզվում է` դրանք համատարած փակվում են. գործը եկամտաբեր չէ։
Շիրակի մարզում օրինակ` սպանդանոց չկա։ Դրա պատճառով սակայն միսը խանութներում ու շուկաներում չի պակասում։ Հետևաբար, կառավարության որոշումը չի գործում. անասնապահները կամ լեզու են գտնում վաճառողների հետ, կամ էլ գնում են սպանդանոցային մորթի մասին փաստաթուղթը։
Կառավարությունն անշուշտ հասկանում է, որ օրենքը չի գործում ու որոշել է պայմաններ ստեղծել` արտոնություններ տրամադրելով։ Օրինակ, սպանդանոցներից չգանձել ավելացված արժեքի հարկը, թույլ տալ վճարել կանխիկով, սպանդանոցային մորթ իրականացնող անասնապահներին քեշբեք տրամադրել։
Կփոխվի արդյոք իրավիճակը և ինչու չեն գործում սպանդանոցները. հարցերն ուղղել ենք Շիրակի մարզի Մարալիկ համայնքի սպանդանոցի սեփականատեր Հրայր Հակոբյանին։