Պեսկովը մեկնաբանել է Պուտինի և Թրամփի հնարավոր հեռախոսազրույցի վերաբերյալ հարցը

ԵՐԵՎԱՆ, 6 նոյեմբերի – Sputnik. ՌԴ նախագահի մամուլի քարտուղար Դմիտրի Պեսկովը հայտարարել է, որ առաջիկայում Վլադիմիր Պուտինի և Դոնալդ Թրամփի հնարավոր հեռախոսազրույցի մասին պետք է հարցնել ոչ ռուսական կողմին։ Այս մասին ասել է նա լրագրողներին` պատասխանելով այն հարցին, թե արդյոք Կրեմլում սպասում են, որ Թրամփը Ուկրաինայի հակամարտության կարգավորման հարցով կզանգի Պուտինին, և ՌԴ նախագահը պատրաստ է արդյոք պատասխանել այդ հեռախոսազանգին։

«Հավանաբար այդ հարցը մեզ չպետք է ուղղել։ Եվս մեկ անգամ հիշեցնում եմ ձեզ Պուտինի ասածը, որ բաց է շփումների և երկխոսությունների համար։ Սակայն դա մեր դիրքորոշումն է, և այն քաջ հայտնի է աշխարհում։ Մնացածը`եկեք սպասենք կոնկրետ գործողությունների», – ասել է Պեսկովը։

ՌԴ նախագահի մամուլի քարտուղարը նաև նշել է, որ ԱՄՆ նախագահի ընտրությունների վերաբերյալ ՌԴ նախագահի առաջին արձագանքի մասին ասելիք չունի։

«Նախագահի արձագանքը, դե, ոչինչ ասել չեմ կարող։ Այո՛, մենք փաստում ենք, հաշվի ենք առնում այն տվյալները, որոնք գալիս են Վաշինգտոնից», – նշել է Պեսկովը։

Հիշեցնենք` նոյեմբերի 5-ին ԱՄՆ–ում նախագահական ընտրություններ են անցկացվել։ Ներկայացուցիչների պալատի խոսնակ Մայք Ջոնսոնը հայտարարել է, որ ԱՄՆ նախագահ է ընտրվել Դոնալդ Թրամփը։ Նա հավաքել է ընտրիչների 277 քվե, իսկ հաղթանակի համար անհրաժեշտ է 270–ը։

Նշենք, որ ԱՄՆ–ում 344 մլն բնակչությունից ընտրելու իրավունք ունի 244 միլիոնը։