ԵՐԵՎԱՆ, 5 նոյեմբերի – Sputnik. Իսրայելի ռազմաօդային ուժերը հարված են հասցրել լիբանանյան «Հզբոլլահ» շարժման` Սիրիայի արևմուտքում գտնվող զինապահեստներին։ Տեղեկությունը հայտնում է իսրայելական բանակի մամուլի ծառայությունը։
«Իսրայելի ռազմաօդային ուժերը, հիմնվելով հետախուզության տվյալների վրա, որոշ ժամանակ առաջ հարված են հասցրել Սիրիայի Էլ Քուսայր շրջանում գտնվող զինապահեստներին»,- ասվում է հաղորդագրության մեջ:
Ըստ իսրայելական բանակի` «Հզբոլլահի» տվյալ ստորաբաժանումը Լիբանանում զենք պահելու պատասխանատուն է և վերջերս ընդլայնել է իր գործունեությունը Սիրիայում:
Հիշեցնենք` Իսրայելը հոկտեմբերի 1-ից Լիբանանի հարավում ցամաքային գործողություն է իրականացնում «Հզբոլլահի» ուժերի դեմ և շարունակում հրթիռակոծել հարևան երկիրը, որտեղ արդեն ավելի քան 2 հազար մարդ է զոհվել, ավելի քան մեկ միլիոն անձ փախստական է դարձել: Չնայած կորուստներին (այդ թվում՝ հրամանատարական կազմում)` «Հզբոլլահը» ցամաքային մարտեր է մղում և չի դադարեցնում Իսրայելի տարածքի հրթիռակոծումը:
Իսրայելը նշում է, որ ռազմական արշավի գլխավոր նպատակն է պայմաններ ստեղծել հյուսիսի 60 հազար բնակիչների վերադարձի համար, որոնք մեկ տարի առաջ տարհանվել են «Հզբոլլահի» կողմից պաղեստինյան ՀԱՄԱՍ շարժմանն աջակցելու համար սկսված գնդակոծությունների պատճառով:
Իրավիճակը կրկին սրվեց սեպտեմբերի 17-ին և 18-ին Լիբանանի տարբեր շրջաններում կապի միջոցների զանգվածային պայթյուններից հետո, որոնց հետևանքով տասնյակ մարդիկ մահացան, շուրջ 3 հազար քաղաքացիներ վիրավորվեցին: Ավելի ուշ իսրայելական ավիացիան հարվածեց Բեյրութի հարավային արվարձանում գտնվող բնակելի շենքին, ինչի հետևանքով մահացավ ավելի քան 50 մարդ, այդ թվում՝ «Հզբոլլահի» հատուկ գործողությունների ուժերի հրամանատար Իբրահիմ Աքիլը:
Շիա զինյալներն ի պատասխան հարձակվեցին Իսրայելի ՌՕՈւ «Ռամաթ-Դավիդ» բազայի և Հայֆայի հյուսիսում գտնվող «Ռաֆայել» ռազմարդյունաբերական համալիրի վրա: Մի քանի հրթիռ պայթեց Հայֆայի բնակելի թաղամասերում։