ԵՐԵՎԱՆ, 5 նոյեմբերի – Sputnik. ՀՀ ԱԺ «Քաղաքացիական պայմանագիր» խմբակցության պատգամավոր Սիսակ Գաբրիելյանը հերքում է այն լուրերը, թե ինքը միջնորդել է ՔՊ-ական մեկ այլ պատգամավոր Անդրանիկ Քոչարյանին ԱԺ պաշտպանության հանձնաժողովի նախագահի պաշտոնից հեռացնելու համար։ Այս մասին Գաբրիելյանը հայտնեց խորհրդարանում լրագրողների հետ զրույցի ժամանակ։
Նշենք, որ տևական ժամանակ է՝ նման խոսակցություններ են շրջանառվում, որ խմբակցության շատ անդամներ, հատկապես ՔՊ պատգամավորներ Հրաչ Հակոբյանը (ՀՀ վարչապետի կնոջ` Աննա Հակոբյանի եղբայրը) և Սիսակ Գաբրիելյանը («Ազատություն» ռադիոկայանի նախկին լրագրող) կողմ են Քոչարյանին պաշտոնանկ անելուն, սակայն ՀՀ վարչապետ Նիկոլ Փաշինյանի հետ դեռ չեն քննարկել հարցը։ Անձամբ Անդրանիկ Քոչարյանը հայտնել է` ինքը տեղեկություններ չունի, որ նման օրակարգ կա։
«Չնա նման բան, ձեզանից եմ լսում այդ մասին արդեն շուրջ 1 շաբաթ է։ Ես Անդրանիկ Քոչարյանին պաշտոնանկ անելու հարցով ոչ մի տեղ չեմ դիմել։ Ձևակերպումների հետ էլ համաձայն չեմ, թե գզվռտոց է ՔՊ–ի ներսում․ վարքագծի նման դրսևորումներ չկան»,- նշեց Գաբրիելյանը։
Նրա խոսքով՝ խմբակցության ներսում որևէ քննարկում տեղի չի ունեցել, որ Քոչարյանի աշխատանքից դժգոհություն կա։
Հիշեցնենք, որ ՔՊ կուսակցության նիստը պետք է կայանար հոկտեմբերի 28-ին, սակայն այն չեղարկվեց ԱԺ-ում 2025 թվականի բյուջեի քննարկումների պատճառով։ «Ժողովուրդն» այսօր գրել էր, որ այսօր ՔՊ-ական վերնախավը վարչության նիստում կքննարկի ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի պաշտոնանկության հարցը։