ԵՐԵՎԱՆ, 5 նոյեմբերի – Sputnik. Ադրբեջանում պահվող հայ գերիների ազատ արձակումը մեծապես կօգնի Երևանի և Բաքվի հաշտեցմանը։ Այս մասին հավատարմագրերի հանձնման արարողությունից հետո լրագրողներին ասել է ՌԴ-ում ՀՀ դեսպան Գուրգեն Արսենյանը։
Հայտնել էինք, որ այսօր Ռուսաստանի նախագահին իրենց հավատարմագրերն են հանձնել ն Հայաստանի և Ադրբեջանի դեսպանները:
«Գերության մեջ պահվող անձանց վերաբերյալ մնացած հարցերը պետք է տրվեն ադրբեջանական կողմին։ Եթե Երևանն ու Բաքուն գնում են խաղաղության պայմանագիր կնքելու ճանապարհով, պատրաստվում են ամբողջ աշխարհին հայտարարել, որ 2 պետությունը, 2 ազգն ապրելու են խաղաղ և համագործակցելով, ապա պետք է սկսել քայլերից, որոնք պետք է գնահատվեն»,–ասել է նա։
Դեսպանը հրաժարվել է մեկնաբանել Ադրբեջանում ապօրինի պահվող ռուսաստանցի նախկին գործարար Ռուբեն Վարդանյանի մասին առանձին հարցը՝ նշելով, որ Երևանի համար Հայաստանի քաղաքացիների միջև տարբերություն չկա:
Հիշեցնենք, որ Բաքուն պաշտոնապես հաստատում է 23 հայի գերեվարման փաստը, որոնցից 17-ը հայտնվել են այնտեղ Արցախի դեմ Ադրբեջանի՝ 2023 էվականին սեպտեմբերյան ագրեսիայից հետո։ Նրանց թվում են Արցախի ռազմաքաղաքական ղեկավարության ներկայացուցիչները՝ Արցախի նախկին նախագահներ Արկադի Ղուկասյանը Բակո Սահակյանը, Արայիկ Հարությունյանը, նախկին պետնախարար, բարերա Ռուբեն Վարդանյանը, ՊԲ նախկին հրամանատար Լևոն Մնացականյանը, ՊԲ հրամանատարի նախկին տեղակալ Դավիթ Մանուկյանը և նախկին արտգործնախարար Դավիթ Բաբայանը։ Արցախի ռազմաքաղաքական ղեկավարությունն արդեն մեկ տարուց ավելի է, ինչ ապօրինի պահվում է Բաքվի բանտում։