ԵՐԵՎԱՆ, 3 նոյեմբերի – Sputnik․ Հայաստանի ծանրամարտի հավաքականի անդամ Պետրոս Պետրոսյանը գերծանր քաշային կարգում Եվրոպայի երիտասարդների առաջնության ոսկե մեդալ նվաճեց։
Ծանրամարտիկը պոկում վարժությունում բարձրացրեց 166 կգ, իսկ հրում` 218 կգ։ Երկամարտի 384 կգ արդյունքով Պետրոս Պետրոսյանը դարձավ Եվրոպայի չեմպիոն։
Լեհաստանում ընթացող ծանրամարտի Մ20 և Մ23 տարեկանների Եվրոպայի առաջնությունում գերծանր քաշային կարգում Հայաստանը ներկայացնող Յաշա Մինասյանը երկամարտի 354 կգ արդյունքով 7-րդն է:
Ավելի վաղ հայտնել էինք, որ Հայաստանի ծանրամարտի հավաքականի անդամ, 109 կգ քաշային Գարիկ Կարապետյանը երկամարտի 402 կգ արդյունքով (182+220 կգ) ոսկե մեդալ է նվաճել Լեհաստանում ավարտին մոտեցող Մ20 և Մ23 տարեկանների Եվրոպայի առաջնությունում: Պոկում և հրում վարժություններում ևս Կարապետյանն արժանացել է փոքր ոսկե մեդալներին:
Հայաստանի ծանրամարտի կանանց հավաքականի անդամ, 87 կգ քաշային Լիանա Գյուրջյանը նույնպես ոսկե մեդալ է նվաճել Մ23 տարեկանների Եվրոպայի առաջնությունում՝ երկամարտում ցույց տալով 230 կգ արդյունք (100+130 կգ): Պոկում և հրում վարժություններում ևս Գյուրջյանն արժանացել է փոքր ոսկե մեդալներին:
Հիշեցնենք, որ Եվրոպայի Մ23 և Մ20 տարեկանների առաջնության ոսկե մեդալակիր են դարձել նաև Հայաստանի ծանրամարտի երիտասարդական հավաքականի անդամներ Սուրեն Գրիգորյանը, Էմմա Պողոսյանը, Աննա Ամրոյանը, Նարեկ Մկրտչյանը, Գոռ Սահակյանը, Ալեքսանդրա Գրիգորյանը, Ժորա Գրիգորյանը, Գառնիկ Չոլաքյանը, Ալեքսանդր Լազարյանը, Ջուլիետա Ավանեսյանը։