ԵՐԵՎԱՆ, 3 նոյեմբերի – Sputnik․ Հայաստանի երկու ներկայացուցիչներ Լեհաստանում ընթացող ծանրամարտի Եվրոպայի Մ20 և Մ23 տարեկանների առաջնությունում արծաթե մեդալներ են նվաճել։
Աշոտ Մովսիսյանը պատանիների գերծանր քաշային կարգում պոկեց 158 կգ, հրեց 201 կգ: Երկամարտի 359 կգ արդյունքով նա դարձավ Եվրոպայի պատանեկան առաջնության փոխչեմպիոն։
Աղջիկների Մ23 տարեկանների պայքարում Մերի Թովմասյանը պոկում վարժությունում բարձրացրեց 98, իսկ հրումում` 122 կգ: Երկամարտի 220 կգ արդյունքով նա ևս արծաթե մեդալ նվաճեց։
Ավելի վաղ հայտնել էինք, որ Հայաստանի ծանրամարտի հավաքականի անդամ, 109 կգ քաշային Գարիկ Կարապետյանը երկամարտի 402 կգ արդյունքով (182+220 կգ) ոսկե մեդալ է նվաճել Լեհաստանում ավարտին մոտեցող Մ20 և Մ23 տարեկանների Եվրոպայի առաջնությունում: Պոկում և հրում վարժություններում ևս Կարապետյանն արժանացել է փոքր ոսկե մեդալներին:
Հայաստանի ծանրամարտի կանանց հավաքականի անդամ, 87 կգ քաշային Լիանա Գյուրջյանը նույնպես ոսկե մեդալ է նվաճել Մ23 տարեկանների Եվրոպայի առաջնությունում՝ երկամարտում ցույց տալով 230 կգ արդյունք (100+130 կգ): Պոկում և հրում վարժություններում ևս Գյուրջյանն արժանացել է փոքր ոսկե մեդալներին:
Հիշեցնենք, որ Եվրոպայի Մ23 և Մ20 տարեկանների առաջնության ոսկե մեդալակիր են դարձել նաև Հայաստանի ծանրամարտի երիտասարդական հավաքականի անդամներ Սուրեն Գրիգորյանը, Էմմա Պողոսյանը, Աննա Ամրոյանը, Նարեկ Մկրտչյանը, Գոռ Սահակյանը, Ալեքսանդրա Գրիգորյանը, Ժորա Գրիգորյանը, Գառնիկ Չոլաքյանը, Ալեքսանդր Լազարյանը, Ջուլիետա Ավանեսյանը։