ԵՐԵՎԱՆ, 1 նոյեմբերի - Sputnik. Ռուս գեղասահորդուհի Կամիլա Վալիևան հայտարարել է, որ մտադիր է որակազրկման ժամկետի ավարտից հետո վերադառնալ սպորտ: Այս մասին հայտնում է ՌԻԱ Նովոստին։
Գեղասահորդուհին կարող է մրցումներին վերադառնալ 2025 թվականի դեկտեմբերին։
«Իհարկե, մտքեր կան (վերադառնալ սպորտ)։ Սա վերջը չէ․ վերջին ելույթն ինձ համար ամենահաջողը չէր (նկատի ունեմ Ռուսաստանի առաջնությունը), ուստի մարզական կարիերաս այդքան երիտասարդ տարիքում թողնելը, հավանաբար, հիմարություն է։ Ամեն ջանք կգործադրեմ, որպեսզի կրկին ուրախացնեմ հանդիսատեսին, ինձ, մարզիչներին և իհարկե` բոլոր երկրպագուներին»,-լրագրողներին ասել է 18-ամյա Վալիևան։
Հիշեցնենք, որ սպորտային արբիտրաժային դատարանը (CAS) հակադոպինգային կանոնները խախտելու համար հունվարի 29-ին 4 տարով որակազրկել է Պեկինի օլիմպիական խաղերում թիմային մրցումներում հաղթած Վալիևային և նրա արդյունքները 2021 թվականի դեկտեմբերի 25-ից չեղյալ համարել: Չմշկորդների միջազգային միությունը (ISU) դոպինգային գործի հետաքննության ավարտից հետո վերաբաշխել խաղերի թիմային մրցաշարի մեդալները՝ ոսկին շնորհելով ԱՄՆ-ի հավաքականին, արծաթը՝ Ճապոնիայի թիմին, իսկ բրոնզը՝ ռուսաստանցիներին։ CAS-ը հետևողականորեն մերժել է ISU-ի որոշման դեմ ռուսական և կանադական թիմերի բողոքարկումները՝ որոշումը թողնելով ուժի մեջ: Շվեյցարիայի դաշնային դատարանը նույնպես մերժել է Վալիևային որակազրկելու վերաբերյալ CAS-ի որոշման բողոքարկումը: