Կոռուպցիան հո պոզով–պոչով կենդանի չէ. Sputnik Արմենիայի հետ զրույցում ասել է «Իրազեկ և պաշտպանված սպառող» ՀԿ–ի նախագահ Բաբկեն Պիպոյանը` խոսելով երևանյան տրանսպորտում այսօրվանից պարտադիր դարձած վճարային համակարգի մասին։
«Ժամանակին ԱԺ պատգամավորներց մեկն ամբիոնից ասում էր. «Կոռուպցիան հո պոզով–պոչով կենդանի չէ»։ Հիմա, երբ որ Երևանի քաղաքապետարանը անկանխիկ վճարման համակարգը մի ընկերության է տալիս, որն իր հերթին անգամ ոչ բոլոր բանկերին է թողնում դառնալ իր բաժանորդը, ես ուզեմ, թե չուզեմ, այդ նախադասությունը հիշում եմ»,– նշում է Պիպոյանը։
Հիշեցնենք` Երևանի հասարակական տրանսպորտում վճարում կատարելու համար այսօրվանից քաղաքացիերը պետք է իրենց մոտ կամ 100 դրամանոց մետաղադրամ ունենան, կամ Telcell վճարային համակարգի բջջային հավելված։ Վճարման այլ կանխիկ կամ անկանխիկ տարբերակներ նախատեսված չեն։ Վարորդներին էլ արգելված է ուղևորներից գումար վերցնել ու մանրադրամ վերադարձնել։
Նոր կարգին ընդառաջ արդեն մի քանի օր է հանրության շրջանում խուճապային տրամադրություններ են։ Մարդիկ 100 դրամանոցներ են կուտակում, որպեսզի դրանց հնրավոր դեֆիցիտի առաջացաման դեպքում, կարողանան տրանսպորտից օգտվել։
Քաղաքային իշխանությունն այս կարգավորումը ներկայացնում է որպես միասնական տոմսային համակարգին անցնելու նախապատրաստական քայլ և ստվերի դեմ պայքար։
Ընդդիմախոսները, այդ թվում` «Իրազեկ և պաշտպանված սպառող» ՀԿ–ի նախագահ Բաբկեն Պիպոյանը պնդում են, որ սա բոլորովին այն համակարգը չէ, որ խոստացել էին երևանցիներին, իսկ Telcell–ին մենաշնորհ տալով քաղաքապետարանը բացահայտ կոռուպցիա է հովանավորում։