ԵՐԵՎԱՆ, 31 հոկտեմբերի – Sputnik. Քաղաքապետարանը տոմսային միասնական համակարգի անցնելու համար պայմանագիր է կնքել «Telcell» ընկերության հետ, որն էլ խախտել է կնքված պայմանագրով իր ստանձնած պարտավորությունները։ Այսօր քաղաքապետարանի մոտ հրավիրված ասուլիսի ժամանակ այդ մասին ասաց ավագանու «Մայր Հայաստան» խմբակցության անդամ Մեսրոպ Մանուկյանը։
Ավելի վաղ հայտնել էինք, որ նոյեմբերի 1-ից ավտոբուսներում հնարավոր է միայն վճարել 100-դրամանոց մետաղադրամներով կամ «Telcell»-ով։ Ըստ ավագանու անդամի՝ «Telcell»-ը պարտավոր էր ապահովել, որ ավտոբուսներում հնարավոր լիներ վճարել սովորական բանկային քարտերով։ Այն, ինչ ընկերությունը մինչև հիմա չի արել։ Ավագանու անդամը հարց հնչեցրեց՝ ինչո՞ւ է քաղաքապետարանը ստիպում մարդկանց անձնական տվյալներ փոխանցել «Telcell»-ին։
«Ցույց տվեք բանկային քարտը, ասեք՝ ճպպացնում եմ քաղաքապետարանի ճակատին։ Վերցրեք ձեր քարտը, ասեք՝ ես իմ հարյուր դրամը վճարում եմ, դուք պարտավոր էիք ապահովել, ո՞ւր ա էդ սարքը։ Դուք պարտավոր էիք դա անել ու չեք արել, որովհետև դուք «Telcell»-ին հովանավորում եք, ինչի՞ համար, որովհետև «Telcell»-ը պետք է դառնա մենաշնորհ։ Հարց Սուրեն Գրիգորյանին (փոխքաղաքապետ. Խմբ)՝ դու փայ ունե՞ս, թե՞ չէ, եթե չէ, ինչի՞ ես թևերդ փռել»,- ասաց Մանուկյանը
Ավագանու անդամի խոսքով՝ «Telcell»-ը պայմանագրով պարտավորվել էր նաև տրանսպորտի կառավարման ավտոմատացված համակարգ ներդնել, որպեսզի հնարավոր լիներ պատկերացում կազմել, թե ավտոբուսը երբ և որտեղ կլինի և այլն։
Հիշեցնենք` Երևանում հանրային տրանսպորտի միասնական տոմսային համակարգի ներդրման ժամկետը երկու անգամ հետաձգվել է։
Նախագիծը պետք է ուժի մեջ մտներ 2024 թվականի սեպտեմբերից։ Սակայն հունիսի 17-ին Երևանի քաղաքապետարանի գործակարգավարական նիստի ժամանակ հայտարարվեց, որ այն մեկ կամ երկու ամսով կերկարաձգվի։ Նախատեսվում էր միասնական տոմսային համակարգի ներդրումը սեպտեմբերի 1–ից տեղափոխել նոյեմբերի 1։ Ավելի ուշ քաղաքապետարանը հայտարարեց, որ միասնական տոմսային համակարգի ներդրումը տեղափոխում է 2025 թվականի հունվար։