ԵՐԵՎԱՆ, 30 հոկտեմբերի – Sputnik. ԱՊՀ երկրների ղեկավարների ոչ պաշտոնական գագաթնաժողովը տեղի կունենա դեկտեմբերի վերջին Սանկտ Պետերբուրգում: Ինչպես տեղեկացնում է «Բելտա» գործակալությունը, այս մասին լրագրողներին հայտնել Է ԱՊՀ գլխավոր քարտուղար Սերգեյ Լեբեդևը։
»Նոյեմբերի 28-ին Աստանայում կկայանա ՀԱՊԿ պետությունների ղեկավարների հանդիպումը, իսկ դեկտեմբերի վերջին կանցկացվի ԱՊՀ պետությունների ղեկավարների ավանդական ոչ պաշտոնական հանդիպումը», - ասել է նա։
Անդրադառնալով այլ միջազգային հարթակներում ԱՊՀ երկրների ղեկավարների շփումներին՝ Լեբեդևը հիշեցրել է Կազանում ԲՐԻԿՍ-ի գագաթնաժողովը, որի շրջանակում բազմաթիվ երկկողմ հանդիպումներ են տեղի ունեցել, այդ թվում՝ Ադրբեջանի նախագահի և Հայաստանի վարչապետի միջև։
Գլխավոր քարտուղարը նաև նշել է, որ ԱՊՀ-ն կա և զարգանում է ի շահ կառույցում ընդգրկված բոլոր պետությունների: «Չնայած հավաքական Արևմուտքի վարած քաղաքականությանը` ԱՊՀ երկրների տնտեսությունը չի տուժել, մեծանում է փոխադարձ առևտրի ծավալը»,– հավելել է նա:
Ավելի վաղ ՌԴ նախագահ Վլադիմիր Պուտինը նման ոչ պաշտոնական գագաթնաժողովները բնութագրել էր որպես ընկերական զրույցներ, որոնց ընթացքում քննարկվում է տարածաշրջանային և միջազգային գործարար օրակարգը: