ԵՐԵՎԱՆ, 29 հոկտեմբերի – Sputnik. Այսօր Երևանի Դավիթ Բեկի փողոցում խոշոր ավտովթար է տեղի ունեցել, որի հետևանքով 5 ավտոմեքենա է վնասվել։ Տեղեկությունը հայտնում է shamshyan.com–ը։
Ըստ կայքի` ժամը 17:10-ի սահմաններում բախվել են «ԶԻԼ 130», «Kia», «Opel», «BMW» և «Mercedes Vito» մակնիշի ավտոմեքենաները:
«Բախման հետևանքով «ԶԻԼ»-ը, որը բարձված է եղել ավազով, կողաշրջվել է։ Վարորդը ծայրահեղ ծանր վիճակում տեղափոխվել է հիվանդանոց»,–նշված է հաղորդագրության մեջ:
Հրշեջ-փրկարարները հոսանքազրկել են ավտոմեքենաները, փակել գազաբալոնները: Վթարի փաստով քննչական բաժնում նախաձեռնվել է քրեական վարույթ։ Մյուս ավտոմեքենաների վարորդների ինքնությունը պարզվում է։
Ըստ նախնական տեղեկությունների՝ ավտոմեքենաները, բացի «ԶԻԼ»-ից, եղել են կայանված: