ԵՐԵՎԱՆ, 27 հոկտեմբերի – Sputnik. ՀՀ իշխանության մի քանի ներկայացուցիչներ, ԵԿՄ անդամներ, Եռաբլուրում ծաղկեպսակ դրեցին և ծաղիկներ խոնարհեցին 1999 թվականին հոկտեմբերի 27-ին Հայաստանի ազգային ժողովի վրա իրականացված ոճրագործության զոհերի հիշատակին։
«Եռաբլուր» պանթեոն եկած հոգևորականները հիշատակի կարգ մատուցեցին զոհվածների հոգիների հանգստության համար։
«Մենք պարտավոր ենք բացահայտելու Հոկտեմբերի 27-ի գործը, որովհետև գլխատվեց մեր օրենսդիր և գործադիր մարմինը։ Աշխարհում երևի նման 2-3 դեպք է եղել, որ ԱԺ-ում մարդ խփեն։ Եթե սա չբացահայտվի, հետագայում մեր երկիրը չի կարող գոյատևել»,- լրագրողների հետ զրույցում ասաց ԵԿՄ նախագահ Սասուն Միքայելյանը։
Նշենք, որ պանթեոն են այցելել ՀՀ ԱԺ «Քաղաքացիական պայմանակիր» խմբակցության պատգամավոր Անդրանիկ Քոչարյանը և Գագիկ Մելքոնյանը, ԵԿՄ նախագահ Սասուն Միքայելյանը, վարչապետ Վազգեն Սարգսյանի եղբայր Արամ Սարգսյանը և այլք։
Հիշեցնենք, որ 1999թ.-ի հոկտեմբերի 27-ին հանցախումբը` Նաիրի Հունանյանի գլխավորությամբ, ՀՀ ազգային ժողովի նիստերի դահլիճում սպանեց ԱԺ խոսնակ Կարեն Դեմիրճյանին, վարչապետ Վազգեն Սարգսյանին, փոխխոսնակներ Յուրի Բախշյանին և Ռուբեն Միրոյանին, օպերատիվ հարցերով նախարար Լեոնարդ Պետրոսյանին, պատգամավոր Արմենակ Արմենակյանին, Հենրիխ Աբրահամյանին և Միքայել Քոթանյանին:
Հարուցված քրեական գործի նախաքննությունը տևեց 1.5 տարի, դատավարությունը` 2.5։
2003թ–ին ավարտված դատավարության արդյունքում դատարանը որոշեց Նաիրի Հունանյանին, նրա եղբորը` Կարեն Հունանյանին, նրանց քեռուն` Վռամ Գալստյանին, ինչպես նաև Դերենիկ Բեջանյանին, Էդիկ Գրիգորյանին, Նորայր Եղիազարյանին ու Աշոտ Կնյազյանին դատապարտել ցմահ, Համլետ Ստեփանյանին` 14 տարվա ազատազրկման։
Հանցագործությանը հաջորդած 20 տարվա ընթացքում խմբի 8 անդամներից 4-ը մահացան տարբեր հանգամանքներում։
2019թ–ին` «թավշյա հեղափոխությունից» հետո, «Հոկտեմբերի 27»-ի գործը վերաբացվեց։