ԵՐԵՎԱՆ, 27 հոկտեմբերի - Sputnik. Անդրբայկալյան երկրամասի Ներչինսկ քաղաքում գտնվող թիվ 1 ուղղիչ կենտրոնից հարկադիր աշխատանքի դատապարտված չորս մարդ է դիմել փախուստի: Այս մասին ՌԻԱ Նովոստիին հայտնել են ՌԴ Դաշնային պատիժների կատարման ծառայության մամուլի ծառայությունից:
«Հոկտեմբերի 26-ին Ներչինսկ քաղաքի թիվ 1 ուղղիչ կենտրոնի աշխատակիցները նկատել են, որ հարկադիր աշխատանքի դատապարտված 4 մարդ տեղում չեն։ Միջոցառումներ են իրականացվում նրանց հայտնաբերելու ուղղությամբ», - հստակեցրել են մամուլի ծառայությունից։
Նշվում է, որ հարկադիր աշխատանքը պատժատեսակ է, որը կապված չէ ազատությունից զրկելու հետ։
Ավելի ուշ հայտնի է դարձել, որ փախուստի դիմածներից երկուսը՝ Յուրի Ռուսինը և Օլեգ Չեկրիշևը, հայտնաբերվել են Ճիտա քաղաքի միկրոշրջաններից մեկում։ Մյուս երկուսի որոնման ուղղությամբ տարվում են աշխատանքներ։
Հիշեցնենք, որ բռնաբարության համար դատապարտված 6 բանտարկյալներ էլ հոկտեմբերի 26-ին փախել էին Լիպեցկի գաղութից։