ԵՐԵՎԱՆ, 26 հոկտեմբերի – Sputnik. Վրաստանի այսօրվա ընտրություններում որոշվելու է` արդյոք Հայաստանը երբևէ ընդհանուր սահման կունենա ԵՄ–ի հետ, թե ոչ: Այդ մասին «Ֆեյսբուքի» իր էջում գրել է քաղաքագետ Սուրեն Սարգսյանը։
Ըստ նրա` այսօր Վրաստանում, իսկ նոյեմբերի 5–ին` ԱՄՆ–ում կայանալիք ընտրությունները տոտալ ազդեցություն են ունենալու ՀՀ արտաքին քաղաքականության վրա:
«Եթե Վրաստանում վերարտադրվում են գործող իշխանությունները, իսկ ԱՄՆ–ում իշխանությունը վերցնում են նախկինները, դա լուրջ վերադասավորումների է բերելու ողջ տարածաշրջանում»,– գրել է նա:
Քաղաքագետի խոսքով` ԱՄՆ նախկին նախագահ Դոնալդ Թրամփի վարչակազմը մեր տարածաշրջանով պասիվ է զբաղվելու։ Ըստ նրա` մանավանդ Վրաստանում իշխանության հաղթանակի պարագայում, այս հանգամանքն էապես բարձրացնելու է ՌԴ հնարավորություններն առավել ակտիվ գործելու Հարավային Կովկասում:
Հիշեցնենք` խորհրդարանական ընտրությունները երկրում ընթանում են համամասնական ընտրակարգով: Խորհրդարան անցնելու համար կուսակցությունները պետք է հաղթահարեն 5 տոկոսի շեմը։ Ամենաշատ ձայներ հավաքած կուսակցությունը կարող է ներկայացնել վարչապետի թեկնածու: Կառավարության ղեկավարի և կառավարության կազմի հաստատման համար անհրաժեշտ է 150 պատգամավորից 76-ի աջակցությունը:
Հիմնական պայքարը ծավալվելու է իշխող «Վրացական երազանք» կուսակցության, որը հանդես է գալիս ՌԴ-ի հետ հարաբերությունների պահպանման և հակառուսական պատժամիջոցների դեմ, և ընդդիմադիր կուսակցությունների միջև, որոնք ֆինանսավորվում են արևմտյան դրամաշնորհների հաշվին: Եթե չորս հիմնական ընդդիմադիր կուսակցություններն ընդհանուր առմամբ հավաքեն ընտրողների ձայների 50 տոկոսից ավելին, նրանք կարող են ազդել կառավարության ձևավորման վրա: