ԵՐԵՎԱՆ, 26 հոկտեմբերի – Sputnik. ՀՀ վարչապետ Նիկոլ Փաշինյանը Ազգային ժողովում հանդիպել է «Քաղաքացիական պայմանագիր» խմբակցության պատգամավորների, ինչպես նաև կառավարության անդամների հետ։ Տեղեկությունը հայտնում է «Ժողովուրդ» օրաթերթը։
Օրաթերթի տեղեկություններով` հանդիպումը ՔՊ խմբակցության պատգամավորների նախաձեռնությամբ է եղել ու տևել է մինչև ուշ երեկո։
«Նիկոլ Փաշինյանը իր վերջին արտագնա հանդիպումների արդյունքներն է ներկայացրել. խոսքը, մասնավորապես, Կազանում՝ ԲՐԻԿՍ–ի 16–րդ գագաթնաժողովի ընթացքում Իլհամ Ալիևի հետ ունեցած հանդիպման մասին է»,– գրում է թերթը:
Փաշինյանի ելույթից հետո ՔՊ–ականները նրան հարցեր են ուղղել խաղաղության պայմանագրի, սահմանազատման գործընթացի մասին:
Հանդիպման ժամանակ Նիկոլ Փաշինյանը նոր բան չի ասել. «Ինչ գիտենք` դա էր»,– «Ժողովուրդ»–ին ասել են իշխանական պատգամավորները:
Հիշեցնենք, որ հոկտեմբերի 24–ին Հայաստանի և Ադրբեջանի ղեկավարները հանդիպել են Կազանում ԲՐԻԿՍ–ի 16–րդ գագաթնաժողովի շրջանակում։ ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը հանդիպումից հետո արտգործնախարարներին հանձնարարել են շարունակել խաղաղության համաձայնագրի շուրջ բանակցությունները՝ հնարավորինս սեղմ ժամկետում այն վերջնականացնելու և կնքելու նպատակով։