ԵՐԵՎԱՆ, 24 հոկտեմբերի – Sputnik. Իսրայելը Իրանի վրա հարձակումը հետաձգել է ամերիկյան գաղտնի փաստաթղթերի արտահոսքի պատճառով և փոխում է իր ռազմավարությունը։ Տեղեկությունը հայտնում է ՌԻԱ Նովոստին՝ հղում անելով «Times»-ին։
«Ամերիկյան փաստաթղթերի արտահոսքը հետաձգել է հարձակումը որոշ ռազմավարություններ և բաղադրիչներ փոխելու անհրաժեշտության պատճառով: Վրեժխնդրություն կլինի, բայց դրա համար սպասվածից շատ ժամանակ կպահանջվի», - թերթին ասել է երկրի հետախուզության աղբյուրը, որը տեղեկություններ ունի Իսրայելի գործողությունների մասին:
CNN-ն ավելի վաղ հայտնել էր, որԱՄՆ-ն հետաքննում է իր հույժ գաղտնի հետախուզական տվյալների արտահոսքը՝ կապված Իրանին հարված հասցնելու Իսրայելի նախապատրաստման հետ, որը ներառում է Իսրայելի ռազմաօդային ուժերի զորավարժություններ՝ «օդ-երկիր» հրթիռների կիրառմամբ: Հոկտեմբերի 15-ով և 16-ով թվագրված փաստաթղթերը համացանցում սկսեցին շրջանառվել հոկտեմբերի 18-ին: Ըստ CNN-ի՝ դրանց վրա «հույժ գաղտնի» դրոշմագիր կա, և նշված է, որ այդ տեղեկություններին կարող են ծանոթանալ միայն «Հինգ աչք» (Five Eyes) հետախուզական դաշինքի անդամները, որի անդամներն են ԱՄՆ-ն, Կանադան, Նոր Զելանդիան, Մեծ Բրիտանիան և Ավստրալիան։
Հոկտեմբերի 23-ին Պենտագոնի ղեկավար Լլոյդ Օսթինը հայտարարել է, որ իր քարտուղարությունից որևէ մեկը կապ չունի այդ արտահոսքի հետ։
Հիշեցնենք` Իրանը հոկտեմբերի 1-ին պատմության մեջ երկրորդ անգամ զանգվածային հրթիռակոծության ենթարկեց Իսրայելը՝ դա անվանելով ինքնապաշտպանության գործողություն: Իսրայելցի զինվորականները հայտարարում են, որ արձակվել է մոտ 180 բալիստիկ հրթիռ, որոնց մեծ մասը հաջողվել է որսալ: Իսրայելի իշխանությունների տվյալներով՝ գնդակոծության հետևանքով քաղաքացիների թվում զոհեր չկան։ Մի շարք լրատվամիջոցներ հաղորդել են Հորդանան գետի արևմտյան ափին մեկ մարդու մահվան մասին, որը ենթադրաբար պաղեստինցի է եղել (Գազայի հատվածից):
Իրանցիները պնդում են, որ հրթիռները խոցել են Իսրայելի ռազմական օբյեկտները, իսրայելցիները վստահեցնում են, որ նվազագույն վնաս է հասցվել։ Նրանք խոստանում են պատասխան հարված հասցնել, իսկ ԱՄՆ-ն՝ օգնության հասնել իր գլխավոր մերձավորարևելյան դաշնակցին։ ՌԴ ԱԳՆ պաշտոնական ներկայացուցիչ Մարիա Զախարովան Իրանի հրթիռային հարվածից հետո հայտարարել է, որ ԱՄՆ նախագահ Ջո Բայդենի վարչակազմը ձախողվել է Մերձավոր Արևելքում՝ լիակատար անօգնականություն ցուցաբերելով ճգնաժամերի լուծման հարցում: