ԵՐԵՎԱՆ, 23 հոկտեմբերի – Sputnik. Անվտանգության հարցերով քաղաքականության, էկոնոմիկայի և ֆինանսների, մշակութային և հումանիտար հարցերով փոխգործակցությունը պետք է խորացնել ԲՐԻԿՍ անդամ պետությունների միջև։ Այդ մասին հայտարարեց ՌԴ նախագահ Վլադիմիր Պուտինը Կազանում ընթացող ԲՐԻԿՍ 16–րդ գագաթնաժողովի ժամանակ` ներկայացնելով այն 3 հիմնական ուղղությունները, որոնց ուղղությամբ կտարվեն աշխատանքներ։
«ՌԴ–ն արել է ամեն ինչ, որպեսզի ամրապնդի ԲՐԻԿՍ–ի հեղինակությունն աշխարհում, բարձրացնի նրա դերակատարությունը համաշխարհային հարթակներում։ Արել ենք ամեն ինչ, որպեսզի միության նոր անդամ երկրների համար ապահովենք առավելագույն հարթ ու ամբողջական ինտեգրում»,– հայտարարեց Պուտինը։
Նա նշեց, որ առաջին անգամ է ԲՐԻԿՍ–ի գագաթնաժողովն ընթանում ընդլայնված կազմով, և այն ՌԴ նախագահության համար առանցքային իրադարձություն է։
Պուտինն առաջարկեց ԲՐԻՍԿ անդամ երկրների ղեկավարներին նեղ կազմով քննարկել առավել արդիական խնդիրները, մտքեր փոխանակել միջազգային ասպարեզում ԲՐԻԿՍ–ի անդամ պետությունների համագործակցության, այդ թվում` տարածաշրջանային սուր հակամարտությունների շուրջ։
«Կքնարկենք նաև Յոհանեսբուրգում անցկացված նախորդ գագաթնաժողովի ժամանակ ընդուված երկու կարևոր որոշումների կատարման հարցերը` ֆինանսական փոխհարաբերությունների խորացումն ու ամրապնդումը միության շրջանակում, ինչպես նաև մեր միության հետագա ընդլայնման հարցերը»,– ավելացրեց ՌԴ նախագահը։
Նա տեղեկացրեց, որ հարավ–արևելյան երկրներից շատերը մեծ հետաքրքություն ունեն ԲՐԻԿՍ–ի հետ հարաբերություններ հաստատելու հարցում։ «Չպետք է անտեսել այդ հանգամանքը, դա սխալ կլինի»,– նկատեց նա։
Պուտինի խոսքով` 30–ից ավելի երկիր նման հետաքրքրություն է արդեն իսկ ցուցաբերել։ Այս դեպքում, ըստ նրա, պետք է պահպանել հավասարակշռությունը և թույլ չտալ ԲՐԻԿՍ—ի արդյունավետության նվազեցում։
Վերջում նա հայտարարեց, որ ԲՐԻԿՍ անդամ երկրների ղեկավարները պետք է կազմեն այդ երկրների ցանկը և նրանց մասով որոշումը կայացնեն կազանյան այս հանդիպման արդյունքներով։
ԲՐԻԿՍ անդամ երկրների ղեկավարներն առանձնացան նեղ կազմով քննարկում անցկացնելու համար։