ԵՐԵՎԱՆ, 23 հոկտեմբերի – Sputnik. ՀՀ ԱԳ նախարար Արարատ Միրզոյանը զգուշավոր, սակայն հաստատուն լավատեսություն ունի, որ շատ մոտ ապագայում Թուրքիայի հետ հարաբերություններում նոր, շոշափելի ձեռքբերումներ են լինելու։ Այս մասին ԱԺ հարցուպատասխանի ժամանակ ասաց Արարատ Միրզոյանը։
«Այս անգամ պակաս զգուշավոր, մի փոքր ավելի շատ հաստատ լավատեսությամբ կարող եմ ասել, որ Թուրքիայի հետ մեր երկխոսությունը բավականին դրական տեմպերով է զարգանում և բավական դրական բովանդակություն ունի։ Հույսս այն է, որ շատ մոտ ապագայում մենք կտեսնենք նոր և էլի նոր, շոշափելի ձեռքբերումներ»,– ընդգծեց նա։
Նա ավելացրեց, որ «3+3» խորհրդատվական հարթակի հանդիպումների շրջանակում ունեցել է մի շարք երկկողմ հանդիպումներ, այդ թվում` նախարար Հաքան Ֆիդանի հետ։
Միրզոյանը նշեց, որ Ֆիդանի հետ բավականին հանգամանալից ու բովանդակալից խոսակցություն են ունեցել ինչպես երկկողմ օրակարգի, այնպես էլ տարածաշրջանային հարցերի վերաբերյալ։
Հիշեցնենք` 2021 թվականի վերջից Երևանն ու Անկարան սկսել են բանակցություններ հարաբերությունների կարգավորման շուրջ՝ նշանակելով հատուկ ներկայացուցիչներ։
2022 թվականին պայմանավորվածություն է ձեռք բերվել երրորդ երկրների քաղաքացիների կողմից սահմանը հատելու հնարավորության և բեռների ուղիղ ավիափոխադրումներ սկսելու մասին, սակայն հարցը դեռևս մնում է չլուծված։