ԵՐԵՎԱՆ, 23 հոկտեմբերի – Sputnik․ Չկա նման առաջարկ, որ «3+3» -ը դառնա Հայաստանի և Ադրբեջանի միջև խաղաղության պայմանագրի քննարկման հարթակ, բայց եթե լինի էլ, պաշտոնական Երևանը դա նպատակահարմար չի գտնի։ Այսօր Ազգային ժողովում կառավարության հետ հարցուպատասխանի ժամանակ նման հայտարարություն արեց ՀՀ ԱԳ նախարար Արարատ Միրզոյանը՝ պատասխանելով «Քաղաքացիական պայմանագիր» խմբակցության քարտուղար Արթուր Հովհաննիսյանի հարցին։
«Սեղանին չկա դրված առաջարկ` «3+3»-ը դարձնել Հայաստան-Ադրբեջան բանակցությունների հարթակ, բայց եթե լինի էլ, մենք նպատակահարմար չենք գտնի դրան դրական արձագանքել, որովհետև մենք Ադրբեջանի հետ ունենք մեր երկկողմ բանակցությունների ձևաչափը, ընդ որում՝ բոլոր ուղղություններով՝ և՛սահմանազատման, և՛ խաղաղության պայմանագրի շուրջ, և՛ հարաբերությունների կարգավորման»,- ասաց Միրզոյանը։
ՀՀ արտաքին քաղաքական գերատեսչության ղեկավարը հավելեց՝ այլ բան է, որ ինչպես տարբեր բազմակողմ միջոցառումների հանդիպումների ընթացքում, այնպես էլ «3+3»-ի, տարբեր երկրների նախարարներն օգտագործում են առիթն ու նաև երկկողմ հանդիպումներ են ունենում։ Այս անգամ էլ բացառություն չի եղել.
ՀՀ ԱԳ նախարարն իր ադրբեջանցի գործընկերոջ հետ բանակցությունների հերթական ռաունդն է անցկացրել, կենտրոնացել են խաղաղության պայմանագրի տեքստի վրա, փորձել դրական զարգացում ապահովել՝ հնարավորինս մոտեցնելով պայմանագրի շուտափույթ կնքումը։
Ավելի վաղ Մոսկվայում հոկտեմբերի 7-8-ը կայացած ԱՊՀ գագաթնաժողովի շրջանակներում Հայաստանի վարչապետ Նիկոլ Փաշինյանը Ադրբեջանի նախագահ Իլհամ Ալիևին առաջարկել էր երկօրյա հանդիպում կազմակերպել արտգործնախարարների մակարդակով, որպեսզի վերջնականապես համաձայնեցվի խաղաղության պայմանագրի նախագիծը:
Դրանից առաջ Հայաստանի և Ադրբեջանի ԱԳ ղեկավարները հանդիպել էին սեպտեմբերի 26–ին Նյու Յորքում, ԱՄՆ պետքարտուղար Էնթոնի Բլինկենի նախաձեռնությամբ և մասնակցությամբ։