ԵՐԵՎԱՆ, 18 հոկտեմբերի – Sputnik. Երևանում` Կինոյի տանը, մեկնարկեց «Արցախյան օրեր» մշակութային միջոցառումը։ Sputnik Արմենիայի հետ զրույցում «ԴԻԶԱԿ ԱՐՏ» մշակութային ՀԿ համահիմնադիր, միջոցառման կազմակերպիչ Լիանա Պետրոսյանը նշեց, որ նախատեսել են եռօրյա միջոցառումների շարք։
Այսօր «Արցախյան օրերի» մեկնարկը տրվել է ցուցահանդեսով և Արցախի ջազ նվագախմբի ելույթով։ Հաջորդող օրերին Երևանում և ՀՀ տարբեր մարզերում հանդես կգա «ԴԻԶԱԿ ԱՐՏ»–ի երգի–պարի համույթը, կլինի տաղավարային ցուցահանդես–վաճառք և ժենգյալով հացի վարպետաց դաս, ինչպես նաև կանցկացվի «Գուպար» ազգային–ավանդական խաղերի մրցում։
Պետրոսյանը տեղեկացրեց, որ ցուցահանդեսին ներկայացված են արցախցի 3 նկարիչների կտավներ, որոնք եզակի նմուշներ են և արվել են հենց Արցախում։
Երևանից դուրս միջոցառումները կանցկացվեն Կոտայքի և Արարատի մարզերում, որտեղ էլ և հիմնականում ապրում են Արցախից տեղահանվածները։
«Արցախյան օրերը» Երևանում
© Sputnik / Armine Armenakyan
«Միջոցառման նպատակը ոչ միայն արցախցիներին հավաքելն ու շփումներ հաստատելն է, այլև տեղացիների ու տեղահանվածների միջև կապի հաստատումը։ Համայնքային կապերի ստեղծում և սոցիալականացում փորձում ենք անել հատկապես մշակույթի միջոցով»,– նշեց նա։
«ԴԻԶԱԿ ԱՐՏ»–ի համահիմնադիրն ավելացրեց, որ այս միջոցառումների նպատակն է պահպանել նաև ոչ նյութական մշակութային ավանդույթները, դրանց հանրահռչակումը` շեշտը դնելով բարբառի և հատկապես Հադրութի բարբառի վրա։ Ի դեպ, «ԴԻԶԱԿ ԱՐՏ» ՀԿ–ի 3 համահիմնադիրները Արցախի Հադրութի շրջանից են։
«Արցախյան օրերը» Երևանում
© Sputnik / Armine Armenakyan
Պետրոսյանի խոսքով` նաև ՀՀ մարզերի տեղաբնակներն են ձգտում ներգրավել «Արցախյան օրերի» միջոցառումներին։ ՀԿ–ի կազմակերպած ազգային երգի, պարի, թատերաարվեստի, նկարչության և կիրառական արվեստի դասընթացներին հաճախում են 5–14 տարեկան 150–ից ավելի աշակերտ։ «ԴԻԶԱԿ ԱՐՏ»–ն ունի երկու մասնաճյուղ` Երևանում և Աբովյանում։