ԵՐԵՎԱՆ, 15 հոկտեմբերի - Sputnik. ՀՀ վարչապետ Նիկոլ Փաշինյանը Ադրբեջանի նախագահ Իլհամ Ալիևին առաջարկել է ԱԳ նախարարների երկկողմ հանդիպում անցկացնել։ «Արմենպրեսի» հետ զրույցում հայտնել է Ազգային ժողովի Արտաքին հարաբերությունների մշտական հանձնաժողովի նախագահ Սարգիս Խանդանյանը։
«Որքան տեղյակ եմ՝ հոկտեմբերի 7-8-ը Մոսկվայում տեղի ունեցած ոչ ֆորմալ շփումների ժամանակ վարչապետ Փաշինյանը նախագահ Ալիևին առաջարկել է երկկողմ հանդիպում ունենալ: Ավելի ճիշտ, առաջարկվել է, որ ԱԳ նախարարները երկօրյա հանդիպում ունենան, համաձայնեցնեն Խաղաղության պայմանագրի չհամաձայնեցված մեկ-երկու հոդվածները, ապա առաջնորդները նախքան Բաքվում COP-29-ի կայացումը ստորագրեն պայմանագիրը: Ես, անկեղծ ասած, Ադրբեջանի արձագանքից տեղյակ չեմ, բայց հույս ունեմ՝ այս տրամաբանությունը հնարավոր կլինի իրագործել»,- ասել է Խանդանյանը։
Նշենք՝ ՀՀ վարչապետ Նիկոլ Փաշինյանը հոկտեմբերի 7-8-ը Մոսկվայում մասնակցում էր ԱՊՀ երկրների ոչ պաշտոնական գագաթնաժողովին։
Լրատվամիջոցի հետ զրույցում Խանդանյանը նաև մեկնաբանել է ադրբեջանական կողմի հայտարարությունները, թե Հայաստանը հրաժարվել է Մեծ Բրիտանիայում հուլիսին կայացած Եվրոպական քաղաքական համայնքի շրջանակներում հանդիպման առաջարկից: Խանդանյանի խոսքով՝ Հայաստանը ոչ թե հրաժարվել, այլ նպատակահարմար չի համարել նոր ֆորմատով հանդիպումը և Ադրբեջանին առաջարկել է Մեծ Բրիտանիայում ունենալ երկկողմ հանդիպում, ինչից հրաժարվել է Ադրբեջանը, որն էլ ավելի վաղ հրաժարվել էր հնգակողմ ֆորմատով հանդիպումներից:
Հավելենք, որ Հայաստանի և Ադրբեջանի ղեկավարները հունիսի 19-ին մեկնել էին Մեծ Բրիտանիա՝ մասնակցելու Եվրոպական քաղաքական ընկերակցության գագաթնաժողովին: