ԵՐԵՎԱՆ, 15 հոկտեմբերի – Sputnik. Հայկական «Atam» ստարտափը ատամները մաքրելու համար նոր հավելված է մշակում։ Երեխաները ծրագրում միավորներ հավաքելու համար պետք է իրենց ատամները մաքրելու գործընթացը նկարահանեն հեռախոսի տեսախցիկով (կամ պարզապես այդ պահին սելֆի անեն): Այդ դեպքում հավելվածը նրանց միավոր կտա։ Հակառակ դեպքում երեխան կսկսի հեռախոսով հիշեցումներ և հորդորներ ստանալ: Այս մասին Sputnik Արմենիային ասաց «Atam»-ի համահիմնադիր Արամ Գևորգյանը։
Համացանցում նման ծրագրեր կան, բայց դրանք, ինչպես նշեց Գևորգյանը, երեխաներին պարզապես միավորներ են տալիս, իսկ այս դեպքում այդ միավորները կարելի է փոխանակել նվերների հետ։ Առաջին փուլում նվերները կարող են վիրտուալ լինել, բայց հետո «Atam»-ը ցանկանում է ստեղծել դուստր ձեռնարկությունների ցանց (մանկական խանութներ, զվարճանքի կենտրոններ և այլն), որոնք այդ միավորները կվերածեն բոնուսների (զեղչեր, նվեր քարտեր և այլն):
Գևորգյանն ու նախագծի մյուս համահիմնադիր Աննա Մալխասյանը ցանկանում են մի քանի ամսից ավարտին հասցնել հավելվածը, իսկ հետո տեղայնացնել տարբեր լեզուներով (այդ թվում՝ հայերեն):
Մալխասյանն ու Գևորգյանն իրենց նախագիծը ներկայացրել են վերջերս Երևանում կայացած «DigiTech» ամենամյա ցուցահանդեսի ժամանակ, որը կազմակերպել էր Հայաստանի Առաջատար տեխնոլոգիաների ձեռնարկությունների միությունը (UATE)։