ԵՐԵՎԱՆ, 14 հոկտեմբերի – Sputnik. Հայաստանի բարձրագույն խմբի մի քանի թիմերի ֆան-շարժումներ միացել են Առաջին հայկական ճակատի (FAF) շարժմանը, որը պահանջում է Հայաստանի ֆուտբոլի ֆեդերացիայի նախագահ Արմեն Մելիքբեկյանի հրաժարականը։ Նրանք պատրաստ են միանալ նաև առաջիկա գործողություններին ու ակցիաներին։ Այս մասին ասվում է նրանց համատեղ հայտարարության մեջ։
Հոկտեմբերի 13-ին Հայաստանի հավաքականը սեփական հարկի տակ 0։2 հաշվով պարտվեց Հյուսիսային Մակեդոնիայի ընտրանուն և գործնականում զրկվեց C լիգայի չորրորդ խմբում առաջին տեղի համար պայքարելու հնարավորությունից։ Խաղից անմիջապես հետո հայտնի դարձավ, որ թիմի գլխավոր մարզիչ Ալեքսանդր Պետրակովը պաշտոնանկ է արվել, իսկ երկրպագուները հավաքվել էին ՀՖՖ շենքի մոտ՝ պահանջելով հանդիպում ֆուտբոլի ֆեդերացիայի նախագահ Արմեն Մելիքբեկյանի հետ։ Ավելի ուշ երկրպագուները սկսեցին պահանջել Մելիքբեկյանի հրաժարականը։
«Դեռ ամիսներ առաջ՝ ՀՖՖ նախագահի ընտրություններից առաջ, հանդես եկանք համատեղ հայտարարությամբ, որում պնդեցինք, որ ՀՖՖ գործող ղեկավար կազմի վերընտրվելու դեպքում հայկական ֆուտբոլը ոչ միայն չէր բարձրանալու նոր մակարդակի, այլև շարունակելու էր իր ազատ անկումը: Ցավոք՝ մենք ճիշտ էինք մեր պնդումներում: Դրա վառ ապացույցը տոտալ ձախողումներն են, որոնք արձանագրվել են ընտրություններից հետո»,-նշված է հայտարարության մեջ։
Նրանք ընդգծել են, որ հայկական ֆուտբոլն այս պահին գոյություն ունի միայն մասնավորի շնորհիվ։ Նրանք դժգոհ են, որ Հայաստանի պրեմիեր լիգայի հանդիպումները շարունակում են նշանակվել աշխատանքային օրերի աշխատանքային ժամերին, բացակայում է առողջ համագործակցությունը ՀՖՖի և ակումբների միջև։
«Վստահ էինք առաջ և ավելի վստահ ենք հիմա` նման իրավիճակում, առանց փոփոխությունների հայկական ֆուտբոլն ապագա չունի»,-նշված է հայտարարության մեջ։
Հայտարարությունը ստորագրել են «Արարատ-Արմենիայի», «Փյունիկի», «Ուրարտուի» և «Շիրակի» ֆան-ակումբները: