ԵՐԵՎԱՆ, 13 հոկտեմբերի – Sputnik. Երևանի տրանսպորտային ռեֆորմն ամբողջականացնելու համար մնում է 150-200 ավտոբուսի գնում իրականացնել, դրանով ավտոբուսային պարկի հարցը փակած կլինենք։ Այս մասին այսօր լրագրողների հետ զրույցում ասել է Երևանի քաղաքապետ Տիգրան Ավինյանը։
Նա հիշեցրել է, որ համայնքային բյուջեի հաշվին այս տարի գնվել է 171 հատ 8,5 մետրանոց ավտոբուս և 15 տրոլեյբուս։
Նոր խմբաքանակը, այն է՝ 22 ավտոբուս և 10 տրոլեյբուս արդեն Երևանում են։
Անդրադառնալով միասնական տոմսային համակարգին, Ավինյանը նշեց, որ համակարգի անցման պահից սկսած ստվերային գումարներն ամբողջությամբ դուրս կգան, որովհետև փաստացի դուրս կգան նաև կանխիկ գործարքները։
«Վերջին մեկ ամսվա ընթացքում մենք ապահովել ենք ռեկորդային հավաքագրումներ՝ համեմատած նախորդ բոլոր ժամանակաշրջանների հետ։ Միասնական տոմսային համակարգը ոչ միայն Երևանի քաղաքապետարանի համար է կարևոր՝ հավաքագրման ստվերը վերացնելու և մնացյալ տեսանկյունններից, այլ առհասարակ մարդու հարմարավետության տեսանկյունից»,- ասաց Տիգրան Ավինյանը։
Ինչ վերաբերում է հասարակական տրանսպորտի գնին, Ավինյանը ևս մեկ անգամ հիշեցրեց, որ տրանսպորտի գինը հունվարից փոխվելու է, սակայն վստահեցրեց, որ դա մարդկանց բյուջեի վրա էական ազդեցություն չի ունենա։