Մի քանի տասնյակ քաղաքացիներ բողոքի ակցիա են իրականացրել ՄԱԿ-ի հայաստանյան գրասենյակի մոտ, որի նպատակը Ադրբեջանում նոյեմբերին նախանշված ՄԱԿ-ի Կլիմայի փոփոխության միջազգային համաժողովին ընդառաջ Բաքվում պահվող հայ պատանդների, գերեվարված անձանց, անհետ կորածների ճակատագրերի հարցը բարձրացնելն է։
«Մենք պետք է այս ընթացքում պարտադրենք Ադրբեջանին կատարել միջազգային մարդասիրական իրավունքի դրույթները։ Հայաստանը պետք է առավել ակտիվ քայլեր ձեռնարկի միջազգային հարթակներում այս կարևոր հարցը բարձրաձայնելու համար»,-լրագրողների հետ ճեպազրույցում ասել է Արցախի մարդու իրավունքների պաշտպան Գեղամ Ստեփանյանը։
Ակցիայի մասնակիցներն իրենց պահանջներն ամփոփող նամակ են հանձնել ՄԱԿ-ի գրասենյակի աշխատակցին։
ՄԱԿ-ի գրասենյակի առջև Գեղամ Ստեփանյանն ընթերցել է ՄԱԿ-ի գլխավոր քարտուղար Անտոնիո Գուտերեշին ուղղված նամակը, որում նշվում էր, որ միջազգային հանրությունն աչք փակեց Ադրբեջանի ՝ Արցախի 150,000 բնակչության հանդեպ կիրառած լայնածավալ ագրեսիայի վրա։