ԵՐԵՎԱՆ, 10 հոկտեմբերի – Sputnik. Այս տարվա համար ԵՏՀ–ի հաստատած քվոտայով 8000 էլեկտրամոբիլից մնացել է միայն 600–ը, որոնց ներմուծման համար կառավարությունն այսօր առանձին որոշում կայացրեց։
«Այս տարվա էլեկտրամոբիլների քվոտան վերջացել է, սակայն առաջարկվում է մնացած 600–ի դեպքում էլ պահպանել արտոնյալ կարգավիճակը` 0 տոկոս մաքսատուրք, սակայն պայմանով` ով շուտ հասավ մաքսակետ ու ձևակերպումներն արեց, նա էլ կօգտվի այդ արտոնությունից»,– հայտարարեց ՀՀ էկոնոմիկայի նախարար Գևորգ Պապոյանը։
Նրա խոսքով` նախորդ տարիներին երբեք էլեկտրամոբիլների նման պահանջարկ չի եղել և ներմուծվել է ընդամենը մի քանի տասնյակը, սակայն այս տարի աննախադեպ ակտիվություն է եղել և, ըստ էության, հոկտեմբերի 1–ի դրությամբ 7400 սահմանաչափն ամբողջովին սպառվել է։ Պապոյանը նշեց, որ ներմուծողների 74.1 տոկոսը եղել են ֆիզիկական անձինք։
«էլեկտրամոբիլներից 600–ը պահվել է, որպեսզի այն ընկերությունները, որոնք դիլերական, դիստրիբյուտերական պայմանագրերի հիման վրա են պաշտոնական ներկայացուցիչներից իրականացնում ներմուծում, կարողանան, ըստ էության, իրենց ապահովագրել ու անխոչընդոտ ներմուծում անել»,– հայտարարեց նախարարը։
Էլեկտրամոբիլների քվոտավորումը ՀՀ–ում գործում է 2019 թվականից։ ՀՀ կառավարության որոշմամբ` այս մեքենաներն ազատված են նաև ԱԱՀ մուծումներից։
ՀՀ փոխվարչապետ Մհեր Գրիգորյանն իր հերթին նշեց, որ հետագայում այս մեքենաների համար արտոնյալ ռեժիմ ու քվոտա ստանալը ԵԱՏՄ–ում բավականին դժվար է լինելու, քանի որ Ղազախստանը, Ռուսաստանը, նաև Ղրղզստանը պլանավորում են էլեկտրամոբիլների արտադրության լոկալիզացիա։