ԵՐԵՎԱՆ, 10 հոկտեմբերի – Sputnik. ՀՀ–ում առաջին անգամ ուսուցիչները կամավոր կատեստավորվեն էլեկտրոնային եղանակով։ Որոշումն ընդունվեց ՀՀ կառավարության նիստի ժամանակ։
ՀՀ կրթության, գիտության, մշակույթի և սպորտի նախարար Ժաննա Անդրեասյանի խոսքով` ուսուցիչների կամավոր ատեստավորումը մեկնարկել է 2021 թվականից և միշտ լուրջ խնդիր է եղել, որ գործընթացն իրականացվում էր թղթային տարբերակով, որը բազմաթիվ բարդություններ ու ժամանակային խնդիրներ էր առաջացնում ուսուցիչների համար։
Այժմ նախարարությունն առաջարկում ներդնել ատեստավորման էլեկտրոնային եղանակ։
«Այս մեխանիզմով կկարողանանք էապես կրճատել ժամանակը, որը ծախսվում էր առաջադրանքները լուծելու, այնուհետև այդ առաջադրանքների պատասխանները ձևաթղթում անցկացնելու համար։ Այստեղ նաև չէին բացառվում տեխնիկական վրիպակներն ու անճշտությունները։ Բացի այդ, սա ևս մեկ միջոց կլինի խրախուսելու ուսուցիչներին տեղեկատվական տեխնոլոգիաներ հմտություններից օգտվելու համար։ Սա նաև հնարավորություն է տալիս, որ ուսուցիչը թեստային առաջադրանքն ավարտելուց անմիջապես հետո տեսնի իր արդյունքը»,– հայտարարեց Անդրեասյանը։
Նա նշեց, որ կրթական նոր չափորոշիչներով կլինի նաև նոր առարկաներով ուսուցիչների ատեստավորման հնարավորություն։ Օրինակ` «Ինֆորմատիկա» առարկան փոխարինվում է «Թվային գրագիտություն և համակարգչային գիտություն» առարկայով։
Նախարարն ավելացրեց, որ կամավոր ատեստավորման գործընթացին մասնակցելու համար դիմումների ընդունելությունն արդեն իսկ ավարտվել է, և նոյեմբերի 9–ից առաջին անգամ ՀՀ–ում կմեկնարկի ուսուցիչների կամավոր ատեստավորման էլեկտրոնային տարբերակով գործընթացը։
Կամավոր ատեստավորմանը մասնակցելու համար դիմել են ուսուցիչներ, ինչպես նաև մանկավարժի որակավորմանը համապատասխանող, սակայն չաշխատող շուրջ 6000 քաղաքացիներ, որոնք, Անդրեասյանի խոսքով` կամավոր ատեստավորումն անցնելուց հետո հիմնականում աշխատում են դպրոցներում։