ԵՐԵՎԱՆ, 10 հոկտեմբերի – Sputnik. ԱՊՀ երկրների ղեկավարները հրավիրվել են Կազանում կայանալիք ԲՐԻԿՍ-ի գագաթնաժողովին, բոլորը հաստատել են իրենց մասնակցությունը: Այս մասին ճեպազրույցի ժամանակ հայտնել է Ռուսաստանի նախագահի օգնական Յուրի Ուշակովը։
«Հրավիրվել են նաև այն պետությունները, որոնք այժմ նախագահում են տարածաշրջանային ազդեցիկ ինտեգրացիոն միավորումներում՝ Աֆրիկայում, Լատինական Ամերիկայում, Մերձավոր Արևելքում և Հարավարևելյան Ասիայում», – հավելել է նա:
Ուշակովի խոսքով՝ Ռուսաստանը տրամաբանական է համարում ԲՐԻԿՍ-ին ԱՊՀ շահագրգիռ երկրների մասնակցության հայտերի դիտարկումը:
«Մենք ունենք մեր առաջնահերթությունները և նկատառումներն այն մասին, թե այդ կատեգորիայի գործընկեր-պետություններից որին կարելի էր հրավիրել։ Առաջին հերթին, մեր կարծիքով, միանգամայն տրամաբանական է դիտարկել ԱՊՀ այն երկրների հայտերը, որոնք շահագրգռված են ԲՐԻԿՍ-ի հետ համագործակցությամբ», - ասել է ՌԴ նախագահի օգնականը։
Հիշեցնենք` ԲՐԻԿՍ-ի գագաթնաժողովը կանցկացվի Կազանում հոկտեմբերի 22-24-ին: Ակնկալվում է, որ միջոցառմանը կմասնակցեն 33 միջազգային պատվիրակություններ, այդ թվում` առնվազն 26 պետությունների ղեկավարներ: Թաթարստանի մայրաքաղաք մեկնելու համաձայնություն են տվել Բրազիլիայի նախագահ Լուիս Ինասիու Լուլա դա Սիլվան, Հնդկաստանի վարչապետ Նարենդրա Մոդին, Հարավաֆրիկյան Հանրապետության նախագահ Սիրիլ Ռամապոսան, ՉԺՀ Նախագահ Սի Ծինփինը, Հայաստանի վարչապետ Նիկոլ Փաշինյանը, Թուրքիայի նախագահ Ռեջեփ Թայիփ Էրդողանը, Լաոսի նախագահ Տխոնգլուն Սիսուլիտը և այլք: