Երևանի Ջոն Կիրակոսյանի անվան դպրոցի ծնողներն այսօր ահազանգել էին, որ 9-րդ դասարանում ֆիզիկայի դասաժամին դասասենյակ են ներխուժել ԱԱԾ աշխատակիցները, երեխաների աչքի առաջ ուսուցչին տապալել գետնին, մազերից քաշել, ապա ձեռքերը ոլորած դուս հանել դպրոցի շենքից։
Երևանի քաղաքապետարանից հաստատել են, որ դպրոցում գործողություններ է իրականացրել ԱԱԾ–ը և որ ուսուցիչը տեղափոխվել է քննչական կոմիտե։
Քննչական կոմիտեն էլ հայտնել է, որ ուսուցիչը ձերբակալվել է քնիչի որոշմամբ։ Նրա նկատմամբ հարուցվել է քրեական հետապնդման` անչափահասի նկատմամբ անառակաբարո արարք կատարելու համար։
Տեղի ունեցածը, ծնողների պնդմամբ, խիստ վախեցրել է երեխաներին և առաջացրել իրենց զայրույթը։
Փաստաբան Ռուբեն Մելիքյանի երեխաները ևս այդ դպրոցի աշակերտներ են։ Փաստաբանը ֆեյսբուքյան ուղիղ եթերում հայտարարել է, որ երեխաները կարծել են, թե ահաբեկիչներ են մտել դպրոց և խուճապի մատնված սկսել են թաքնվել։