ԵՐԵՎԱՆ, 7 հոկտեմբերի – Sputnik. Երևանի Արզումանյան փողոցի վթարային 2 շենքի վերաբերյալ ծրագիրը քաղաքապետարանի պարտավորությունների մեջ չի մտնում: Դա զուտ բարի կամքի դրսևորում է։ Այս մասին Երևանի քաղաքապետարանի գործակարգավարական խորհրդակցության ժամանակ ասաց քաղաքապետի խորհրդական Անետա Բաբայանը` ներկայացնելով Արզումանյան փողոցի 10 և 17 հասցեներում գտնվող վթարային շենքերի փոխարեն նոր շենքեր կառուցելու և վթարային շենքերի բնակիչներին նոր բնակարաններով ապահովելու ծրագիրը։
«Այս պահին 76 միավորից մենք ունենք 18 մնացորդային գույք։ Նրանց հետ դեռ պայմանագիր կնքված չէ։ Նրանցից մի քանիսի հետ կան սկզբունքային անհամաձայնություններ։ Մենք հուլիս ամսից սկսած ենք հասել նրան, որ արդեն 18–ն են մնացել, մարդկանց հետ աշխատում ենք։ Դատավարական գործընթացներում էլ ենք գտնվում, դրանք էլ ձգձգվում են, ինչի հետևանքով ծրագիրը տուժում է»,– ասաց Բաբայանը։
Երևանի քաղաքապետ Տիգրան Ավինյանն էլ ընդգծեց` բոլորը պետք է հիշեն` այս ծրագրերում քաղաքային իշխանությունը որևէ պարտավորություն չունի և սա բարի կամքի դրսևորում է բնակիչների նկատմամբ։ Քաղաքապետի պնդմամբ` 4-րդ ռիսկայնության շենքի մասին է խոսքը։ Որևէ մեկը չգիտի, թե դրանք երբ կփլուզվեն, բայց վստահ է` մի օր հաստատ կփլուզվեն։
«Խոսքս վերաբերում է այն բնակիչներին, որոնք այս կամ այն պատճառով հանդիմանում են այս գործընթացը. ձգձգումները, դատավարական պրոցեսները կարող են հանգեցնել նրան, որ Երևանի քաղաքապետարանն առհասարակ հրաժարվի այս ծրագրից»,– ասաց Ավինյանը։
Նա հիշեցրեց` Արզումանյան 11 և 17 հասցեների բնակարանները զրո արժեք ունեն, որովհետև 4-րդ ռիսկայնության շենքում են։