ԵՐԵՎԱՆ, 4 հոկտեմբերի – Sputnik. Հայաստանում գործող ընկերություններից մեկը վնաս է հասցնում Արաքսի էկոհամակարգին։ Իրանական կողմի այս մտահոգության մասին ՀՀ գլխավոր դատախազ Աննա Վարդապետյանին հայտնել է նրա ռուս գործընկեր Իգոր Կրասնովը։
Գլխավոր դատախազների հանդիպումը տեղի է ունեցել Երևանում` ԱՊՀ երկրների գլխավոր դատախազների համակարգող խորհրդի 34-րդ նիստի շրջանակում։
«Իրանի Իսլամական Հանրապետության գլխավոր դատախազ Մոհամմադ Մովահեդ Ազադի հետ հունիսին կայացած իմ հանդիպման ընթացքում իրանցի գործընկերը կրկին ուշադրություն էր հրավիրել Արաքս գետի էկոհամակարգի վրա ձեռնարկություններից մեկի տնտեսական գործունեության բացասական ազդեցության հետ կապված իրավիճակի վրա», – հայտնել է Կրասնովը։
Հաշվի առնելով այդ ուղղությամբ հայ գործընկերների կատարած մեծ աշխատանքը, նա առաջարկել է եռակողմ խորհրդակցություն անցկացնել հարցին վերջնական լուծում տալու համար։
«Առավել ևս որ մեր տեղեկություններով ձեռնարկությունում արդեն իսկ ներդրվել է շրջանաձև ջրամատակարարման համակարգ։ Երախտապարտ կլինեմ հարցի լուծման համար», – ասել է Կրասնովը։
Նշենք, որ ՀՀ–ի և ՌԴ–ի գլխավոր դատախազները հանդիպման արդյունքում ստորագրել են համագործակցության ութերորդ ծրագիրը։