ԵՐԵՎԱՆ, 4 հոկտեմբերի - Sputnik. ՀՀ գլխավոր դատախազությունը 2023 թվականի սեպտեմբերից մինչև 2024 թվականի սեպտեմբերը պետությանն է վերադարձրել 30 միլիոն դոլարը գերազանցող գույք և ֆինանսական միջոցներ։ Այս մասին այսօր ԱՊՀ անդամ երկրների գլխավոր դատախազների համակարգող խորհրդի նիստի ժամանակ Երևանում հայտարարել է ՀՀ գլխավոր դատախազ Աննա Վարդապետյան։
Նա նշել է, որ ապօրինի ծագում ունեցող գույքի բռնագանձման ոլորտում 2020 թվականից մինչ օրս դատախազությունը նախաձեռնել է 537 ստուգում։ Դատարան ներկայացված երեք գործով արդեն իսկ կայացվել են ապօրինի ծագում ունեցող գույքի բռնագանձման վերաբերյալ որոշումներ՝ հօգուտ Հայաստանի Հանրապետության։
«Ներկայում դատարանները քննում են ապօրինի ծագում ունեցող գույքի բռնագանձման վերաբերյալ 107 հայց, որոնց ընդհանուր գումարը գերազանցում է 1 մլրդ 440 մլն դոլարը։ Այս հայցերը առնչվում են ոչ միայն դրամական միջոցներին, այլ նաև անշարժ և այլ տեսակի գույքին, իրավաբանական անձանց բաժնետոմսերի բռնագանձմանը, ընդհանուր առմամբ՝ շուրջ 2000 օբյեկտներ»,– ասել է նա։
Գլխավոր դատախազը տեղեկացրել է նաև, որ ապօրինի ծագում ունեցող գույքի բռնագանձման վարույթներով կնքվել է 8 հաշտության համաձայնություն, ինչի արդյունքում պետությանը վերադարձվել է ավելի քան 5 միլիարդ դրամ, որը համարժեք է ավելի քան 12 միլիոն դոլարի։
Հիշեցնենք, որ այսօր Երևանում տեղի է ունենում ԱՊՀ անդամ երկրների գլխավոր դատախազների համակարգող խորհրդի 34-րդ նիստը, որին մասնակցում են Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի և Ուզբեկստանի դատախազությունների պատվիրակությունները։